Tilraunarekstur lofthreinsistöðvar við Hellisheiðarvirkjun hafin

Tilraunarekstur lofthreinsistöðvar við Hellisheiðarvirkjun, sem felur í sér niðurdælingu brennisteinsvetnis (H₂S) frá virkjuninni, hófst þriðjudaginn 8. júní eftir nokkurra vikna gangsetningarprófanir. Stefnt er að því að stöðin hreinsi 15-20% af brennisteinsvetninu og minnki þannig líkur á því að styrkur brennisteinsvetnis í andrúmslofti fari yfir mörk í byggð.

Þetta er í samræmi við kröfur þær sem fylgja framlengingu undanþágu sem umhverfis- og auðlindaráðuneytið hefur gefið en þær fela í sér að Orkuveitu Reykjavíkur skal uppfylla heilsuverndarmörkin eins og þau er í dag, þ.e. 50 µg/m3 sem sólarhrings meðaltal, og má einungis fara yfir þau mörk fimm sinnum á ári.

Í tilkynningu frá Orkuveitu Reykjavíkur segir:

Í hreinsistöðinni er brennisteinsvetni og koltvísýringur skilin frá útblástursgufunni. Lofttegundirnar eru leystar upp í vatni frá virkjuninni og dælt niður á meira en 1.000 metra dýpi. Tilraunir, sem  vísindafólk hér á landi og erlendis hefur unnið að síðustu ár, gefa til kynna að brennisteinsvetnið bindist berggrunninum sem steintegundin brennisteinskís, sem er betur þekkt sem glópagull.

Reikna má með að það taki nokkrar vikur eða mánuði að ná fullum tökum á tæknilegum rekstri stöðvarinnar. Samkvæmt þeirri verkefnisáætlun, sem unnið er eftir, er reiknað með að reka stöðina í eitt ár áður en metið er hvort þessi nýja aðferð ber tilsettan árangur.

Tækifæri til hagnýtingar
Vísindamenn Orkuveitunnar telja að gangi þetta rannsóknar- og þróunarverkefni upp, sé þetta umhverfisvænsta og hagkvæmasta leiðin til að draga úr styrk brennisteinsvetnis í andrúmslofti. Það ræðst meðal annars af því að ekki er talið hagkvæmt, enn sem komið er, að vinna afurðir úr jarðhitaloftinu.

Með hreinsistöðinni skapast þó möguleikar á aukinni fjölnýtingu, það er að vinna verðmæti úr  jarðhitagösunum. Stefnt er að því að skilja koltvísýring frá brennisteinsvetni í stöðinni. Hann er markaðsvara, til dæmis til nýtingar í gróðurhúsum og framleiðslu á vistvænu eldsneyti. Vetni gæti líka lagst til, sem nýta mætti í ýmsa framleiðsluferla, eða sem eldsneyti. Nokkrir aðilar eru áhugasamir um að láta á þessi tækifæri reyna og hafa verið í samskiptum við Orkuveituna vegna þess.

Háfur
Samhliða niðurdælingunni er nú til skoðunar að reisa gufuháf við virkjunina. Rannsóknir á veðurfari við virkjunina benda til að með honum megi tryggja aukna dreifingu útblásturs og draga þar með úr styrk brennisteinsvetnis í andrúmslofti. Í umfangsmikilli verkefnisáætlun, sem Orkuveitan kynnti fyrir rúmu ári, kemur fram að samhliða niðurdælingu muni fyrirtækið skoða aðrar lausnir. Háfurinn er ein þeirra. Aðrar leiðir eru áfram til skoðunar.

Ýtarlegar upplýsingar
Á heimasíðu Orkuveitu Reykjavíkur er að finna margvíslegar upplýsingar um útblástur brennisteinsvetnis. Þar eru til dæmis tenglar á rauntímamælingar á styrk þess í byggð og á virkjanasvæðunum, skýrslur með yfirförnum mæliniðurstöðum og verkefnisáætlunina sem Orkuveitan vinnur eftir.

Sjá síðu OR um brennisteinsvetni og niðurstöður mælinga.