Velheppnuð vinnustofa

Hópur vaskra kvenna sat daglangt á vistræktarvinnustofu Kristínar Völu Ragnarsdóttur og Önnu Gandelman á leikskólanum Vesturborg síðastliðinn laugardag. Tilgangurinn var að kynna meginhugmyndir vistræktar og hanna svo leikskólalóðina í anda vistræktarviðmiða.

Ekki vantaði hugmyndaflugið en konurnar höfðu núverandi virkni lóðarinnar að leiðarljósi og komu með tillögu um innsetningu eða breytingar sem gæti orðið umhverfinu, börnunum og starfsmönnum til góðs. Ennfremur var lögð áhersla á að börnin tækju þátt í umbreytingunni en á morgun, laugardaginn 24. maí, kl. 10-13, munu aðstandendur leikskólans, foreldrar, börn og starfsfólk, ásamt nokkrum nemendum vinnustofunnar láta hendur standa fram úr ermum, búa til hugelkultur beð og jarðvinna matjurtarreit skólans.

Öllum sem áhuga hafa, er velkomið að slást í hópinn, kynna sér tillögur kvennanna og læra eitt og annað um vistrækt um leið og höndunum er stungið í mold.