Sushi, söl, geitaostur og hlaðnir garðar - námskeið í Ólafsdal við Gilsfjörð

Ólafsdalsfélagið býður upp á áhugaverð námskeið sem munu fara fram í Ólafsdal við Gilsfjörð og í nágrenni hans - í ágúst og september n.k. Námskeiðin fjögur fjalla ýmist um lífrænt ræktað grænmeti, ostagerð, sushi/söl/þara eða torf- og grjóthleðslu. Í öllum námskeiðunum er fléttað inn kynningum á hugmyndum Slowfoodhreyfingarinnar og um Ólafsdalsskólann á 19. öld. Inn fléttast lífræni matjurtagarðurinn í Ólafsdal, hráefni til ostagerðar úr nágrenninu (kýr, sauðfé og geitur),  fjaran í Tjaldanesi og torf/grjótgarðar og veggir sem hlaðnir voru á sínum tíma í Ólafsdal. Meðal leiðbeinenda eru Dominique Pledel, Rúnar Marvinsson, Jóhanna Þorvaldsdóttir, Sigríður Jörundsdóttir, Elsa Dórothea Gísladóttir, Eggert Antonsson og Ari Jóhannesson.

Námskeiðin eru unnin í samvinnu við Vaxtarsamning Vesturlands, Fræðslumiðstöð Vestfjarða, Dalabyggð og Reykhólahrepp, Þörungaverksmiðjuna, Þjóðfræðisetur og Slowfood Reykjavík og Matur-saga-menning.  Nánari upplýsingar á www.olafsdalur.is og á vefsíðum samstarfsaðila, skráning á olafsdalur@gmail.is.

Ljósmynd: Gamla skólabyggingin í Ólafsdal, nýuppgerð.