}

Dagur íslenskrar náttúru

Staðsetning
Óstaðsett
Hefst
Miðvikudagur 16. september 2015 00:00
Lýkur
Miðvikudagur 16. september 2015 23:59
til baka sjá mánuð

Tengt efni

Frá verðlaunaafhendingum 2013. Náttúruverndarviðurkenningu Sigríðar í Brattholti hlaut þá frú Vigdís Finnbogadóttir og Fjölmiðlaverðlaunain hlaut Páll Steingrímsson. Ljósm. Guðrún Tryggvadóttir.Umhverfis- og auðlindaráðuneytið auglýsir eftir tilnefningum til tvennra verðlauna sem afhent verða á Degi íslenskrar náttúru, 16. september næstkomandi. Annars vegar er um að ræða Fjölmiðlaverðlaun umhverfis- og auðlindaráðuneytisins og hins vegar Náttúruverndarviðurkenningu Sigríðar í Brattholti.

Fjölmiðlaverðlaunum umhverfis- og auðlindaráðuneytisins er ætlað að hvetja til hverskyns umfjöllunar um íslenska náttúru, hvort heldur er í því skyni að vekja athygli á einstakri náttúru landsins eða benda á þær ógnir sem steðja að íslenskri náttúru og mikilvægi þess að varðveita hana og vernda til framtíðar.

Verðlaunin verða veitt fjölmiðli, ritstjórn, blaða- eða fréttamanni, dagskrárgerðarfólki eða ljósmyndara sem hafa skarað fram úr með umfjöllun sinni um íslenska náttúru. Til greina koma einstök verkefni eða heildarumfjöllun um íslenska náttúru.

Þá verður Náttúruverndarviðurkenning Sigríðar í Brattholti veitt einstaklingi sem hefur unnið markvert starf á sviði náttúruverndar. Sigríður Tómasdóttir, fæddist 24. febrúar 1871 í Brattholti. Sigríður var baráttukona og náttúruverndarsinni sem lagði mikið á sig í baráttu gegn virkjun Gullfoss. Hún var því brautryðjandi á sviði náttúruverndarmála hér á landi og hefur æ síðan verið íslenskum náttúruverndarsinnum fyrirmynd.

Óskað er eftir tilnefningum til beggja viðurkenninga í síðasta lagi 16. ágúst 2015. Tilnefningar með rökstuðningi sendist umhverfis- og auðlindaráðuneytinu, Skuggasundi 1, 101 Reykjavík, eða á netfangið postur@uar.is

Birt:
7. ágúst 2015
Tilvitnun:
Umhverfis- og auðlindaráðuneytið „Óskað eftir tilnefningum til verðlauna á Degi íslenskrar náttúru“, Náttúran.is: 7. ágúst 2015 URL: http://nature.is/d/2015/06/15/oskad-eftir-tilnefningum-til-verdlauna-degi-islens/ [Skoðað:28. mars 2024]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.
skrifað: 15. júní 2015
breytt: 7. ágúst 2015

Undirbúningur vegna Dags íslenskrar náttúru, sem haldinn er hátíðlegur 16. september ár hvert, stendur nú sem hæst. Upplýsingar um viðburði, verkefni og uppákomur sem efnt er til í tilefni dagsins má senda á umhverfis- og auðlindaráðuneytið og verða þær þá birtar á heimasíðu dagsins á vef ráðuneytisins.
Þetta er í fimmta sinn sem dagurinn er haldinn hátíðlegur og hafa æ fleiri stofnanir, félagasamtök, sveitarfélög, skólar, fyrirtæki og einstaklingar haft daginn í huga í sinni starfsemi. Líkt og áður efnir umhverfis- og auðlindaráðherra til hátíðarsamkomu þar sem fjölmiðlaverðlaun ráðuneytisins og Náttúruverndarviðurkenning Sigríðar í Brattholti verða afhent.

Að þessu sinni beinir umhverfis- og auðlindaráðuneytið athyglinni sérstaklega að þeim stöðum og fyrirbærum í íslenskri náttúru sem hver og einn hefur hvað mest dálæti á. Öll eigum við okkar óskastaði, hvort sem það er tjörn í túnfætinum heima, lundur í íslenskum skógi, fjall sem býður einstakt útsýni, friðlýst svæði, þjóðgarður eða leynistaður sem geymir ljúfar minningar og leyndarmál. Hver sem staðurinn er þá endurspeglar hann þá staðreynd að íslensk náttúra er órjúfanlegur hluti sjálfsmyndar okkar Íslendinga.           

Í tengslum við Dag íslenskrar náttúru er hvatt til þess að fólk deili sögum og jafnvel myndum sem tengjast óskastöðum og eftirlætisfyrirbærum þeirra í íslenskri náttúru. Notast verður við myllumerkin #stadurinnminn og #DÍN á samfélagsmiðlum í því sambandi. Þar skipta staðsetningar staða eða náttúrufyrirbæra ekki höfuðmáli heldur getur frásögn eða mynd af ónefndum stað þjónað sama tilgangi, sem er að beina sjónum að því hversu margbreytileg íslensk náttúra er og hversu fjölbreytt upplifun okkar er á því sem hún hefur fram að bjóða.

Upplýsingar um viðburði má senda á netfangið bergthora.njala@uar.is. Verður þeirra þá getið á heimasíðu Dags íslenskrar náttúru á www.uar.is

Birt:
2. september 2015
Tilvitnun:
Bergþóra Njála Guðmundsdóttir „Dagur íslenskrar náttúru nálgast“, Náttúran.is: 2. september 2015 URL: http://nature.is/d/2015/09/02/dagur-islenskrar-natturu-nalgast/ [Skoðað:28. mars 2024]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.

Verðlaunagripurinn Jarðarberið eftir Finn Arnar Arnarson. Ljósm. Guðrún Tryggvadóttir.Dómnefnd hefur tilnefnt þrjá til fjölmiðlaverðlauna umhverfis- og auðlindaráðuneytisins sem veitt verða á Degi íslenskrar náttúru, miðvikudaginn 16. september næstkomandi.

Tilnefnd til verðlaunanna eru Hallgrímur Indriðason, fréttamaður á RÚV, Iceland Review og þáttaröðin „Lífríkið í sjónum við Ísland“.  Rökstuðningur dómnefndar fyrir valinu er eftirfarandi:

Hallgrímur Indriðason, fréttamaður á RÚV, sem gerði hápólitísku deiluefni um virkjanakosti í Þjórsá ítarleg og góð skil í sjónvarpsfréttum 17. maí sl. Þar nálgaðist hann viðfangsefnið úr mismunandi áttum, gerði andstæðum sjónarmiðum jafnhátt undir höfði og nýtti margs konar möguleika sjónvarps í því skyni að upplýsa áhorfendur um áhrif umræddra kosta á náttúruna með skýrum og hlutlægum hætti. Fréttaskýringar um þjóðmál, þar sem nýttir eru mismunandi eiginleikar myndmiðilsins til að koma upplýsingum betur á framfæri, mættu að ósekju sjást oftar í sjónvarpi hér á landi.

Iceland Review, sem sagði frá eldgosinu í Holuhrauni í fjölda vandaðra og upplýsandi greina og með ljósmyndum sem komu hrikafegurð eldsumbrotanna og áhrifum þeirra á viðkvæma náttúru vel til skila við erlenda og innlenda lesendur. Iceland Review leitaði víða fanga við fréttaöflun og fjallaði um ýmis sjónarhorn sem síður sáust í dagblöðum og ljósvakamiðlum þótt framvindu gossins væri einnig fylgt eftir með hefðbundnum hætti. Umfjöllunin birtist í prentaðri útgáfu blaðsins sem og í hátt í 300 greinum á vef tímaritsins, ávallt á lipru og læsilegu máli.  

Þáttaröðin „Lífríkið í sjónum við Ísland“, sem tekin var til sýningar á sjónvarpsstöðinni N4, og er röð stuttra þátta ætluð til vekja athygli á fjölbreyttu náttúrulífi neðansjávar. Þáttagerðin er metnaðarfull, myndataka undir yfirborði sjávar og þulartexti spila vel saman, og þættirnir höfða jafnt til eldri aldurshópa sem yngri. Raunar hafa þeir vakið athygli langt út fyrir landsteinana. Erlendur Bogason, Heiðar Þór Valtýsson, Húni Húnfjörð og Pétur Halldórsson hafa í sameiningu unnið fróðlega og skemmtilega sjónvarpsþætti um lífríki í einstakri náttúru, allt frá smæstu lífverum til þeirra stærstu, sem að öðrum kosti væri flestum hulinn heimur.

Verðlaunagripinn, Jarðarberið, hannaði Finnur Arnar Arnarson.

Í dómnefnd sitja Þór Jónsson formaður, Árni Gunnarsson og Snæfríður Ingadóttir.

Birt:
14. september 2015
Tilvitnun:
Bergþóra Njála Guðmundsdóttir „Tilnefningar til fjölmiðlaverðlauna á Degi íslenskrar náttúru“, Náttúran.is: 14. september 2015 URL: http://nature.is/d/2015/09/14/tilnefningar-til-fjolmidlaverdlauna-degi-islenskra/ [Skoðað:28. mars 2024]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.

Nýtt efni:

Veður frá windyty.com

Skilaboð: