Japan telur árið 2005 „sanngjarna“ viðmiðun fyrir nýjan Kýótó-samning

Japan telur að árið 2005 væri „sanngjarnt“ grunnár til að reikna út frá samdrátt í útblæstri gróðurhúsalofttegunda í samningi sem tæki við af Kýótó-samningnum, að því er Reuters hefur eftir háttsettum embættismanni þar í landi.

Japan hefur hafnað því að halda árinu 1990 sem viðmiðunarári fyrir niðurskurð útblásturs í samningi sem tæki við eftir að Kýótó-samningurinn fellur úr gildi árið 2012. Japan telur að árið 1990 væri ósanngjarnt gagnvart japönskum iðnaði sem hafi fjárfest í orkusparandi tækni fyrir tveimur áratugum.

Í frétt Reuters kemur fram að Evrópusambandið mundi líklega mótmæla breytingum á grunnári, en sambandið hafi viljað ná útblæstri árið 2020 niður um 20% frá því sem hann var árið 1990.

Um 190 þjóðir samþykktu í Balí í fyrra að fara í tveggja ára samningaviðræður til að finna framhald á Kýótó-samningnum.