Að byggja og búa í sátt við náttúruna

Sesseljuhús - umhverfissetur á Sólheimum stendur fyrir sýningunni „Að byggja og búa í sátt við náttúruna“ sem opnar fimmtudaginn 15. júní. Sýningarstjóri er ný r umsjónarmaður Sesseljuhúss, Bergþóra Hlíðkvist Skúladóttir. Sýningin er hluti af Menningarveislu Sólheima sem haldin er á tímabilinu 3. júní til 7. ágúst. Í fréttatilkynningu um sýninguna skrifar Bergþóra: „Það þótti viðeigandi að fyrsta sýningin í Sesseljuhúsi fjallaði um sjálfbærar byggingar þar sem húsið er hannað og byggt með sjálfbærni í huga. 

Sýningin byggir á hugmyndafræði sænska arkitektsins Varis Bokalders en hann hefur sérhæft sig í hönnun sjálfbærra bygginga og byggðahverfa og notar hugmyndafræðina við kennslu í arkitektúr. Mun Varis koma til Sólheima í haust og halda fyrirlestur í Sesseljuhúsi. Sýningin fjallar um hvaða kröfur eru gerðar til sjálfbærra bygginga og hvað neytandinn getur gert, bæði í efnisvali og eigin lífsstíl, til að stuðla að sjálfbærri þróun. Bent er á hvernig Sesseljuhús stenst kröfur um að vera sjálfbær bygging og hvað byggðahverfið Sólheimar er að gera til að stuðla að sjálfbærri þróun.

Opnunartími: 10:00-18:00 alla daga og aðgangur er ókeypis.

Sjá nánari um Sesseljuhús á vef Sólheima.