Garðurinn

Garðurinn er sælureitur okkar og griðastaður.  Hann getur verið af hvaða stærð sem er. Í garðinum höfum við litla náttúruvin til að heimsækja í dagsins önn, einnig þegar tíminn er stuttur. Heimsókn í garðinn getur gefið okkur mikið jafnvel þótt við horfum einungis á hann út um gluggann eða hugsum til hans.

Garðar geta verið af öllum gerðum, allt frá því að vera næsta alfarið úr steinum og völum í anda japanskra garða, algrónar gróðurvinjar, leikvellir eða einungis eitt tré. Sumir garðar í sveitinni geta verið margir hektarar með húsdýrum, köttum og mús. Í garðinum er tilvalið að vera með endurvinnslutunnur og moltukassa eða moltuhaug til jarðgerðar.