Félag um Samfélagsbanka í burðarliðnum

Formlegur stofnfundur „Félags um Samfélagsbanka“ verður haldinn í sal ReykjavíkurAkademíunnar, Hringbraut 121, 4. hæð, laugardaginn 16. apríl kl 17:00.

Áhugi á stofnun samfélagslega ábyrgum banka, eða sparisjóði, vaknaði upp úr bankahruninu og í aðdraganda komu verðlaunahafa umhverfisverðlauna Norðurlandaráðs fyrir árið 2010 en þau féllu í hlut þriggja banka; hins danska Merkur bank, hins norska Cultura bank og Ekobanken frá Svíþjóð. Verðlaunabankarnir hafa allir notið vaxandi velgengni og trausts almennings á Norðurlöndum. Þeir, ásamt vaxandi fjölda banka, þjóna samfélaginu af réttlæti og sanngirni og efla umhverfis- og félagslega sjálfbærni til langs tíma með því m.a. að renna stoðum undir lífræna fæðuframleiðslu, sjálfbæra orku og mannsæmandi atvinnu- og búsetuúrræði fyrir alla þjóðfélagshópa.

Markmið stofnun Félags um Samfélagsbanka hér á landi er að stuðla að stofnun fjármálafyrirtækis sem:

• byggir á siðferðilegum gildum
• hefur samfélagslega uppbyggileg markmið
• hefur sjálfbæra þróun að leiðarljósi í útlánastefnu sinni fremur en fjárhagslegan hagnað
• gefur fólki kost á að vita hvernig sparifé þess er ráðstafað og möguleika til að hafa áhrif þar á

Allir áhugamenn um endurnýjun og viðsnúning í bankarekstri hér á landi eru hvattir til að mæta á fundinn og taka virkan þátt í félaginu.

Nánari upplýsingar veitir Sigfús Guðfinnsson braudhus@isl.is.