UPS fjölgar metanbifreiðum

Bandaríska flutningafyrirtækið UPS hefur sent frá sér tilkynningu þess efnis að það ætli sér að fjölga metanbifreiðum í flota sínum um 167 en fyrirtækið hefur haft 800 metanbifreiðar í þjónustu sinni síðan 1980.

Nýju bifreiðarnar verða allar verksmiðjuframleiddar metanbifreiðar, sem er ólíkt þeim sem fyrir eru, en þeim var upphaflega breytt úr því að brenna bensíni og dísilolíu í það að brenna metani.

Samkvæmt tilkynningunni er markmið fyrirtækisins með þessu að mæta áskorun um takmörkun á losun gróðurhúsalofttegunda ásamt því að vera minna háð hefðbundnu eldsneyti.