Grænir dagar í HÍ

Meistaranemar við umhverfis- og auðlindafræðideild Háskóla Íslands halda Græna daga í annað sinn dagana 2. – 6. mars nk. Markmið daganna er að vekja nemendur og starfsfólk skólans til vitundar um vistvæna neyslu og endurvinnslu.

Meðal dagskráliða er fatavelta á Háskólatorgi, þar sem menn geta komið með notuð föt og skipt þeim fyrir önnur sem verða á markaðinum, eða keypt notuð föt fyrir lítinn pening. Þrjár kvikmyndir verða sýndar, fyrirtæki í græna geiranum kynna sig og tvenn málþing verða haldin.

Náttúran.is og Land- og ferðamálafræðistofa HÍ munu kynna Græna Íslandskortið á Háskólatorgi þriðjudaginn 3. mars frá kl. 11:00-14:00.

Gaiu - félag meistaranema í umhverfis- og auðlindafræðum, Norræna húsið og Stofnun Sæmundar fróða starfa saman að Grænum dögum.