Umhverfis- og auðlindaráðuneytið auglýsir eftir tilnefningum til tvennra verðlauna sem afhent verða á Degi íslenskrar náttúru, 16. september næstkomandi. Annars vegar er um að ræða Fjölmiðlaverðlaun umhverfis- og auðlindaráðuneytisins og hins vegar Náttúruverndarviðurkenningu Sigríðar í Brattholti.

Fjölmiðlaverðlaunum umhverfis- og auðlindaráðuneytisins er ætlað að hvetja til hverskyns umfjöllunar um íslenska náttúru, hvort heldur er í því skyni að vekja athygli á einstakri náttúru landsins eða benda á þær ógnir sem steðja að íslenskri náttúru og mikilvægi þess að varðveita hana og vernda til framtíðar.

Verðlaunin verða veitt fjölmiðli, ritstjórn, blaða- eða fréttamanni, dagskrárgerðarfólki eða ljósmyndara sem hafa skarað fram úr með umfjöllun sinni um íslenska náttúru. Til greina koma einstök verkefni eða heildarumfjöllun um íslenska náttúru.

Náttúruverndarviðurkenning Sigríðar í Brattholti

Þá verður Náttúruverndarviðurkenning Sigríðar í Brattholti veitt einstaklingi sem hefur unnið markvert starf á sviði náttúruverndar. Sigríður Tómasdóttir, fæddist 24. febrúar 1871 í Brattholti. Sigríður var baráttukona og náttúruverndarsinni sem lagði mikið á sig í baráttu gegn virkjun Gullfoss. Hún var því brautryðjandi á sviði náttúruverndarmála hér á landi og hefur æ síðan verið íslenskum náttúruverndarsinnum fyrirmynd.

Óskað er eftir tilnefningum til beggja viðurkenninga fyrir 16. ágúst 2013. Tilnefningar með rökstuðningi sendist umhverfis- og auðlindaráðuneytinu, Skuggasundi 1, 150 Reykjavík, eða á netfangið postur@uar.is.

Sjá þá sem hlotið hafa Náttúruverndarviðurkenningu Sigríðar í Brattholti til þessa hér á Grænum síðum.
Sjá þá sem hlotið hafa Fjölmiðlaverðlaun umhverfis- og auðlindaráðuneytisins til þessa hér á Grænum síðum.

Ljósmyndir: Efri myndin er af Krækiberinu, fjölmiðlaverðlaunum umhverfis- og auðlindaráðuneytisins og sú neðri af viðurkenningarskjali Hjörliefs Guttormssonar frá í fyrra er hann hlaut Náttúruverndarviðurkenningu Sigríðar í Brattholti. Guðrún A. Tryggvadóttir og Einar Bergmundur tóku myndirnar.

Birt:
14. ágúst 2013
Tilvitnun:
Bergþóra Njála Guðmundsdóttir, Guðrún Arndís Tryggvadóttir „Óskað eftir tilnefningum til verðlauna á Degi íslenskrar náttúru“, Náttúran.is: 14. ágúst 2013 URL: http://nature.is/d/2013/06/13/oskad-eftir-tilnefningum-til-verdlauna-degi-islens/ [Skoðað:28. mars 2024]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.
skrifað: 13. júní 2013
breytt: 14. ágúst 2013

Skilaboð: