Monsanto gefst upp á ræktun í Evrópu

Bandaríska landbúnaðar- og efnatæknifyrirtækið Monsanto hefur dregið til baka umsóknir sínar um að fá að rækta nýjar, erfðabreyttar matjurtir innan Evrópusambandsins, en beiðnir þar að lútandi hafa verið til umfjöllunar innan sambandsins í nokkur ár.

Fyrirtækið hyggst í staðinn einbeita sér að því að rækta þar hefðbundnar matjurtir en tryggja um leið leyfi fyrir innflutningi erfðabreyttra matvæla sem ræktuð eru í Bandaríkjunum. Evrópusambandið hafði leyft ræktun á maístegund fyrirtækisins, MON-810, en Frakkland, Þýskaland og Ítalía bönnuðu ræktun hennar innan sinna landamæra með lögum. Þrátt fyrir almenna tortryggni gagnvart erfðabreyttum matvælum í álfunni er Evrópusambandið meðal stærstu kaupenda erfðabreyttra kornvara, og flytur inn meira en 30 milljón tonn af erfðabreyttu dýrafóðri árlega.