Býflugur í kreppu vegna hlýnunar

Hlýnun í lofthjúpi jarðar er ástæða þess að stofnar býflugna hrynja í Evrópu og Norður-Ameríku. Þetta eru niðurstöður rannsóknar sem birtist nýlega í vísindatímaritinu Science.

Með hækkandi hitastigi hafa norðuramerískar og evrópskar býflugur fært sig norðar á bóginn. Nyrðri jaðar heimkynna býflugnanna hefur þó ekki þokast norðar, heldur dreifast nú býflugurnar á þrengra svæði en nokkru sinni fyrr.

Rannsóknarhópurinn sem stendur að fræðigreininni hefur kannað fækkun í býflugnastofnum en býflugur gegna mikilvægu hlutverki í frjóvgun og viðgangi fjölmargra blómategunda. Rannsakendur lögðu til grundvallar yfir 400.000 mælingar á stofnstærð og dreifingu býflugnategunda í Norður-Ameríku og Evrópu á árabilinu 1975-2010. Í ljós kom að hvorki notkun skordýraeiturs né breytingar í landnýtingu og ræktun höfðu teljandi áhrif á býflugurnar, heldur er hnattrænni hlýnun um að kenna.

Í forsvari fyrir hópinn er Jeremy Kerr sem rannsakar líffræðilegan fjölbreytileika og starfar við háskólann í Ottawa í Kanada. Lesa má umfjöllun tímaritsins Science hér.