Rafmagnshjól í sókn

Nýlega opnaði í Skipholtinu verslunin Rafmagnshjól ehf. en hún selur fjórar gerðir rafmagnshjóla frá af gerðinni QWIC Trend en þau hafa hlotið nokkur fyrstu verðlaun í óháðum hjólaprófunum í Hollandi á undanförnum árum . Hjólin uppfylla alla ströngustu Evrópustaðla. Að sögn Ragnars Kristins Kristjánssonar eiganda verslunarinnar verður von á enn fleiri tegundum með vorinu.

Hjálparmótor í framhjóli er 250 W og 36 V. Hann vinnur aðeins þegar hjólið er stigið og hjálpar því mikið í brekkum og í lengri ferðum. Aðstoð frá hjálpamótor ákvarðast af 6 þrepa hraðastilli sem þú  stjórnar sjálf/ur. Við 25 km hraða hættir hjálpamótorinn að toga með.  Hjálpamótor má ekki vera sterkari en 250 W og aðstoða að hámarki upp að 25 km.

Ragnar bendir á að samkvæmt útreikningi FÍB í janúar 2013, þá sé rekstrarkostnaður bifreiðar að verðmæti 2.800.000 kr. (15.000 km á ári)  1.206.600 kr. Ef hægt er að komast af með einn bíl á heimili, eða jafnvel spleppa bílnum alveg, og vera t.d. á rafmagnshjóli þá er það verulegur sparnaður fyrir heimilið og betra fyrir umhverfið. Ef lengra er litið  - líka stórsparnaður fyrir þjóðfélagið og heilbrigðiskerfið.