Þessar umbúðir eru ekki rusl

„Fólk var mjög jákvætt gagnvart því að fá ábendingu um að flokka umbúðir úr pappír frá öðru rusli,“ sagði Íris Magnúsdóttir starfsmaður Reykjavíkurborgar sem brá sér í verslanir í Árbænum með límmiðavél og merkti vörur með miðanum: „Þessar umbúðir eru ekki rusl“.

Flestallar matvöruverslanir í Reykjavík hafa gefið starfsfólki Reykjavíkurborgar leyfi til að merkja með límmiðum t.d. morgunkornkassa, kexkassa, fernur, eggjabakka og aðrar vörur með umbúðir úr pappír. Þetta er þáttur í kynningarátaki borgarinnar á bláum tunnum og endurvinnslu eða að nú beri að flokka allan pappír frá. Vörur verða einnig merktar á næstunni í verslunum í Grafarvogi og Breiðholti.

„Við höfum flokkað fernur og dagblöð í mörg ár en áttuðum okkur ekki fyrr en nýlega að við gætum einnig flokkað karton með þeim í bláu tunnuna,“ sögðu hjón sem voru ánægð með nýju merkingarnar.

Sorphirða Reykjavíkur býður borgarbúum upp á tvær leiðir til að flokka pappír. Annars vegar með því að panta bláa tunnu heim við hús eða fara með efnið í grenndargáma í nágrenninu.

Íbúar í Grafarvogi, Árbæ og Norðlingaholti hættu alfarið að henda pappír í janúar og nú munu Breiðhyltingar gera það sama í febrúar.

Flokkun á pappír felur í sér möguleika á lægri sorphirðugjöldum. Heimili sem skiptir út grárri tunnu fyrir bláa sparar 12.100 kr. árlega. Blá tunna kostar 6.500 kr. á ári en grá undir blandaðan úrgang 18.600 kr.

Sjá nánar á pappirerekkirusl.is og einnig hér á Endurvinnslukortinu og Endurvinnslukorts-appinu sem má ná í ókeypis.

Ljósmyndir: Morgunkorn með „Þessar umbúðir eru ekki rusl“ í verslun Krónunnar á Höfða þ. 5. janúar sl. Guðrún A. Tryggvadóttir.