Hjá GuðjónÓ - prentplata án framköllunarefna

Árið 2000 fékk prentsmiðjan GuðjónÓ fyrst Svansvottun. Á þeim tíma var umhverfisstarf komið vel á veg á Norðurlöndum og í Þýskalandi, en prentsmiðjur hér heima ekki byrjaðar að skoða sín mál. Það var því mikið brautryðjendastarf að koma á fyrstu vottuninni  og tók 2 ár að breyta starfsemi prensmiðjunnar innanfrá til að uppfylla kröfur Svansins.

Nú hefur GuðjónÓ haft Svansvottun í rúm 12 ár, lengst allra prensmiðja í landinu og græna þróunin heldur stöðugt áfram þar innandyra. Stór gæfuspor hafa verið stigin í umhverfismálum með innleiðingu stafrænna myndavéla og einnig hafa miklar breytingar átt sér stað á sviði stafrænnar prentplötugerðar.

Núna í ágústmánuði sl. byrjaði prentsmiðja GuðjónsÓ að nota þurrplötu en sú tækni felur í sér að platan fer í gegnum plötuskrifarann án framköllunarefna.

Það er liðinn rúmur áratugur síðan flestar prentsmiðjur notuðu filmu til að lýsa á prentplötu og þá þurfti að að nota tvær tegundir framkallara og fixer við þá iðju. Það er því mikið stökk fram á við í umhverfisvænni prentframleiðslu að losna við öll spilliefni úr forvinnslunni sem þurfti að koma til eyðingar.

Prentplatan framkallast með vatni og fonti á prentvélinni við prentun og telja forsvarsmenn GuðjónsÓ að það sé eitt stærsta spor i umhverfismálum í prentiðnaði á síðstu árum.

Nú hafa 8 prentsmiðjur á Íslandi fengið Svaninn. Sjá Svansmerktu prentsmiðjurnar hér á Grænum síðum.