Landvernd auglýsir eftir framkvæmdastjóra

Landvernd, landgræðslu og umhverfisverndarsamtök Íslands auglýsa starf framkvæmdastjóra laust til umsóknar. Ráðið verður til hálfs árs frá 1. september næstkomandi með möguleika á áframhaldandi ráðningu. Framkvæmdastjóri Landverndar sér meðal annars um daglega stjórn samtakanna, framkvæmd starfs- og fjárhagsáætlana, fjáröflun og hefur umsjón með gerð umsagna og álitsgerða. Gerð er krafa um háskólamenntun og áhuga á umhverfismálum.

Hlutverk Landverndar er að standa vörð um íslenska náttúru og vera virkur þátttakandi í stefnumótun, fræðslu og upplýstri ákvarðanatöku í málum er varða landnotkun, auðlindir og umhverfi. Fjöldi félaga og einstaklinga á aðild að Landvernd.

Fyrirspurnir berist Guðmundi Herði Guðmundssyni, formanni Landverndar á netfangið gudmundur@landvernd.is. Umsóknum skal skilað í tölvupósti á sama netfang, ásamt ferilskrá og greinargerð er lýsir hvers vegna umsækjandi sækir um starfið og hví hann telur sig vel til þess fallinn að gegna því.

Umsóknarfrestur er til 2. ágúst 2011.