Náttúran.is sýnir vefinn og Eldhúsgarðinn á Blóm í bæ

Náttúran.is sýnir á tveimur stöðum á sýningunni Blóm í bæ í Hvergerði nú um helgina. Annars vegar er vefurinn kynntur á umhverfissýningunni í íþróttahúsinu og hins vegar er Eldhúsgarðurinn kynntur í Listigarðinum. Guðrún Tryggvadóttir og Hildur Hákonardóttir verða á staðnum og kynna garðinn fyrir gestum en Eldhúsagarðurinn er nýr liður hér á vefnum sem auðvelda á fólki að skipuleggja garðinn sinn.

Þær Guðrún og Hildur settu upp raunverulegan, þrívíðan, lifandi Eldhúsgarð eftir módeilinu á vefnum sérstaklega fyrir sýninguna Blóm í bæ en þær hafa verið að vinna í skipulagi vefútgáfunnar og forrækta jurtir í garðinn frá því snemma í vor.

Garðyrkjustöð Ingibjargar hjálpaði síðan með það sem upp á vantaði af jurtum og BYKO smíðaði kassana sem síðan má kaupa í verslun BYKO á Selfossi á vægu verði.

í dag kl. 16:15 verður síðan sent út viðtal við þær Hildi og Guðrúnu um Eldhúsgarðinn í þættinum „Í boð náttúrunnar“ sem sent verður út á Rás 1.