Dagur hinna villtu blóma - Í Flóanum

Dagur hinna villtu blóma var fagnað í gær á öllum Norðurlöndunum. Náttúrufræðistofnun Íslands skipulagði 14 blómaskoðunarferðir með leiðsögumönnum um allt land. Greinarhöfundur hafði tækifæri til að slást í hópinn sem hittist við Vatnsenda í Flóahreppi (fyrrum Villingaholtshreppi) og voru leiðsögumenn þær Þórunn Kristjánsdóttir og Krístín Stefánsdóttir. Átta þátttakendur voru í blómaskoðunarferðinni sem var farin í fallegu og kyrru veðri. Blómaskrúðið er gríðarlega fjölbreytt í landi Vatnsenda bæði af villtum jurtum sem og ræktuðum skógi og í garði við hús. Flóru Íslands líður greinilega vel í Flóanum við bakka Þjórsár. Mikið áberandi eru fjalldalafífill, mjaðurt, grávíðir og tugir annarra villtra plantna sem skarta sínu fegursta á þessum tíma árs. Á myndinn eru Þórunn Kristjánsdóttir, Kristín Stefánsdóttir, Halldóra Gunnarsdóttir, Guðrún Tryggvadóttir, Elísabet Valdimarsdóttir, Theodór og Esther standa aftar. Ljósmynd: Einar Bergmundur.