Unnið að innleiðingu INSPIRE

Tilskipun Evrópusambandsins um notkun og miðlun landupplýsinga (INSPIRE) tók gildi í maí á liðnu ári. Tilskipunin mun taka gildi hér á landi á grundvelli samningsins um Evrópska efnahagssvæðið og nú er unnið að því í umhverfisráðuneytinu að undirbúa nauðsynlegar lagabreytingar vegna þess. Áskilið er að tilskipunin verði innleidd í íslenska löggjöf fyrir 15. maí 2009.  

Markmið tilskipunarinnar er að samræma og samnýta opinberar landupplýsingar, einkum í þágu umhverfismála. Eitt af lykilatriðum tilskipunarinnar er átak við að gera opinberar landupplýsingar aðgengilegar á netinu.

Það er mat umhverfisráðuneytisins að með því að fylgja hugmyndafræði INSPIRE felist mikil tækifæri til umbóta og hagræðingar meðal opinberra stofnana hér á landi. Landmælingar Íslands hafa nýlega unnið greinargerð og tillögur fyrir umhverfisráðuneytið um innleiðingu INSPIRE hér á landi. Hér má nálgast skýrslu Landmælinga.

Upplýsingasíða Evrópusambandsins um INSPIRE.