Varúð! - Skelfiskur úr Hvalfirði er ekki ætur

Í frétt á vef Umhverfisstofnunar segir að nýjustu mælingar á fjölda svifþörunga í sjósýnum úr Hvalfirði bendi til hættu á eitrun í skelfiski og er fólk því varað við að tína krækling.

Ef magn eitraðra svifþörunga er yfir viðmiðunarmörkum er veruleg hætta á að kræklingur og annar skelfiskur sé óhæfur til neyslu. Heppilegasti tíminn til skelfisktínslu er því á veturna og vorin.

Umhverfisstofnun tekur vikulega sýni í Hvalfirði, sem er vinsæll kræklingatínslustaður meðal fólks á höfuðborgarsvæðinu, en Hafrannsóknastofnun rannsakar sýnin. Fyrir þá sem að stunda kræklingasöfnun er bent á að niðurstöður mælinga eru birtar vikulega á ust.is og einnig á hafro.is .

Sjá nánar í grein um þörungaeitur í skelfiski við Ísland.

Ljósmynd: Guðrún Tryggvadóttir.