Náttúrulegur ljósleiðari

Svampar eru með elstu lífverum jarðar, auk þess sem líkamsgerð þeirra hefur þótt fremur einföld. Hópur þþskra vísindamanna hefur nú komist að því að svampar geta sent ljós sem að þeim berst um og umhverfis líkama sinn. Uppgötvunin kemur mjög á óvart og ekki er hægt að líkja ljóstækni svampanna við annað en þá nútímatækni sem kennd er við ljósleiðara.

Líkami úr silíkoni
Svampar teljast til frumstæðra lífvera. Þeir hafa hvorki vöðva, taugar né meltingarkerfi og eru í raun lítið annað en safn frumna innan í harðri og brothættri skel eða grind sem gerð er úr silíkoni. Tilraunir sem gerðar hafa verið á dauðum svömpum sýna að ljós berst auðveldlega í gegnum skelina. Það er aftur á móti ný uppgötvun að ljós sem berst að lifandi svömpum skuli endurkastast um líkama þeirra á svipaðan hátt og gerist í ljósleiðurum.

Nýjar uppgötvanir
Uppgötvunin er sögð geta varpað ljósi á hvers vegna sumar tegundir svampa geta náð mikilli stærð og hvernig ýmsar minni lífverur lifa í sambýli við svampa á miklu dýpi þar sem birtu sólar ný tur takmarkað. Líffræðingar hafa til dæmis lengi velt fyrir sér hvernig ljósháðir þörungar geta lifað innan í svömpum á miklu dýpi. Rannsóknir á ljósleiðni svampanna er einnig talin geta leitt til nýrra uppgötvana á sviði ljósleiðaratækninnar.