Blaðrar Blaðið bara?

Af frétt í blaðinu Blaðið í gær, undir yfirsögninni „Framtíðarlandið undirbýr framboð“ mátti ráða að Framtíðarlandið (hið óræða félag með 2.611 félögum, sem þó í raun er ekki enný á félag, heldur lítill innsti kjarni, sem hefur staðið fyrir tveimur uppákomum, stofnfundi og haustþingi, auk þess að baka og ramma gullfallega inn piparkökum til styrktar félaginu) væri að undirbúa framboð til Alþingiskosninga 2007.
Í greininni kemur fram að Ósk Vilhjálmsdóttir fari fyrir nefnd innan Framtíðarlandsins, sem vinni að undirbúningi framboðs til Alþingiskosninga í vor. Einnig kemur fram að Ósk, Andri Snær Magnason rithöfundur, Ómar Ragnarsson fréttamaður og náttúruverndargúrú, Hjálmar Sveinsson útvarpsmaður og Jakob Frímann Magnússon tónlistarmaður séu þar hugsanlegir framboðskandídatar. Eins og haft er eftir Jakobi Frímann þá er of snemmt að spekúlera í hverjir verði í framboði fyrir félagið ef af því verði. Andri Snær staðfestir í greininni ekki né útilokar nokkuð.

Greinarhöfundur hefur skrifað Ósk og fleirum innan Framtíðarlandsins og  beðið um staðfestingu á þessari umfjöllunum Blaðsins, það er, hvort í raun sé verið að gæla við hugmynd um framboð eða hvort um sögusagnir sé að ræða. Svör hafa ekki fengist nema frá Andra Snæ sem sannfærði hana um að Framtíðarlandið taki ekki ákvörðun um framboð nema að undangengnu samráði við félaga sína.
-
Grein Blaðsins væri því gripin úr lausu lofti og byggð á getgátum, enda hafi ekki verið boðað til fundar um málið né ákvörðun tekin um hvort það verði gert. Greinarhöfundur bíður því eftir því að málin skýrist enda getur ekki verið gott fyrir umhverfisinnað fólk að vita ekki, í aðdraganda kosninga, hvort það geti verið hluti af Framtíðarlandinu, sé það flokksbundið annars staðar, eða ekki. Það er mikið í húfi að hinn virki kjarni Framtíðarlandsins fari nú að boða félagsmenn sína til fundar um ákvörðunartöku í málinu. Því varla getur ætlunin verið að láta þúsundir eldheitra umhverfissinna bíða á hliðarlínunni til eilífðarnóns.