Ranka í Kotinu - Handverksmaður ársins 2006

Útskurðarmeistarinn Ragnheiður Magnúsdóttir í Gígjarhólskoti í Biskupstungum var valinn Handverksmaður ársins 2006 á Handverkshátíðinni í Hrafnagili nú í mánuðinum. Ranka í Kotinu, eins og hún er jafnan kölluð af sveitungum sínum hefur einstaka formtilfinningu og tæknina fullkomnlega á sínu valdi. Verk hennar eru sannkölluð listaverk og er hún vel að útnefningunni komin. Viðfangsefni hennar eru nátengd næsta nágrenni hennar s.s. dýrunum á bænum, fuglum og fólki. Ranka er ennfremur mikil kunnáttumanneskja í jurtalitun og hefur skrásett tilraunir sínar nákvæmlega. Grasagudda hefur nú þegar skráð allar prufur Rönku og munu jurtalitunaraðferðir og litaprufur vera aðgengilegar hér á gagnagrunni vefsins innan tíðar.
-
Myndin er tekin af verkum Rönku á sýningu sem hún setti upp í eldhúsi sínu að tilefni heimsóknar þátttakenda evrópuverkefnisins Fósturlandsins Freyja (Rural business women) í ágúst á síðasta ári.

Ljósmynd: Guðrún Tryggvadóttir.