Vaxtarsprotar - nýtt þróunarverkefni

Verkefnið nær til landsins alls en unnið er innan ákveðinna svæða hverju sinni og verður verkefninu hrundið af stað á tveimur svæðum á árinu 2007. Þau svæði sem verkefnið mun beinast að á árinu 2007 eru annars vegar Suðurland og hins vegar Húnavatnssýslur og Strandir. Svæðin eru skilgreind með tilliti til starfssvæða ráðunautaþjónusta í landbúnaði en verkefnið er unnið í nánu samstarfi við ráðunauta á hverju svæði sem og atvinnuþróunarfélög og/eða atvinnuráðgjafa.
-
Verkefnið er opið öllum íbúum í sveit, óháð eðli viðskiptahugmynda eða þeim atvinnugreinum sem viðskiptahugmyndir beinast að.
Verkefninu verður hrundið formlega af stað með kynningarfundum sem hafa það að markmiði að hvetja fólk til að skoða tækifæri í nánasta umhverfi, möguleika á stofnun fyrirtækja eða aukningu umsvifa starfandi fyrirtækja. Tilgangur þessara funda er ekki að ræða atvinnumál viðkomandi svæðis almennt, heldur að beina sjónum að tækifærum einstaklinga á svæðinu. Impra hefur fengið í lið með sér áhugaverða fyrirlesara sem flytja munu erindi á fundunum auk þess sem verkefnið verður kynnt ítarlega.
-
Þátttakendur njóta handleiðslu Impru nýsköpunarmiðstöðvar á verkefnistímabilinu en slík þjónusta er hluti af reglulegri starfsemi Impru. Elín Aradóttir verkefnisstjóri hjá Impru veitir nánari upplýsingar um verkefnið í síma 4607970 eða gegnum tölvupóst elina@iti.is

Myndin er af skilti við rjómabúið á Baugsstöðum sem stofnað var af bændum í Stokkseyrarhreppi og nágrannahreppum árið 1905 og starfrækt til 1952. Þar var framleitt smjör og ostar og var búið á sínum tíma sannkallað „nýsköpunarverkefni“. Safnið er opið á laugardögum og sunnudögum í júlí og águst frá kl.13:00 - 18:00 og eftir samkomulagi við safnvörð, sími 486 3369. Ljósmynd: Guðrún Tryggvadóttir.