Fjölmennt Umhverfisþing hefst á morgun

Umhverfisþing hefst á morgun á Hótel Nordica í Reykjavík. Rúmlega 400 hafa skráð sig til þátttöku á þinginu og verður það því fjölmennasta Umhverfisþing sem haldið hefur verið. Sjálfbær þróun verður meginefni þingsins að þessu sinni. Lögð verður áhersla á virka þátttöku þinggesta og því verður efnt til umræðna í heimskaffistíl sem nýtast svo við gerð stefnumörkunar stjórnvalda um sjálfbæra þróun. Þingið hefst föstudaginn 9. október með ávarpi Svandísar Svavarsdóttur umhverfisráðherra kl. 9:00 og því lýkur laugardaginn 10. október kl. 13:00.

Á Umhverfisþingi í ár verður áhersla lögð á þátttöku ungs fólks til að stuðla að umræðu milli kynslóðanna um framtíðarþróun Íslands. Fulltrúar nokkurra ungmennaráða sveitarfélaga hafa skráð sig til þátttöku og Sigríður Ólafsdóttir og Unnsteinn Manuel Stefánsson, nemendur í Menntaskólanum við Hamrahlíð, ávarpa þingið á föstudagsmorgun.

Fjölmörg erindi verða flutt á þinginu. Sjá alla dagskrá þingsins hér.

Nokkur dæmi um erindi sem flutt verða í málstofum föstudaginn 9. október frá kl. 13:30 - 15:30:

• Einstök náttúra, en hversu lengi? – Utanvegaakstur og umgengni ferðafólks. Skúli Skúlason, fulltrúi Samtaka útivistarfélaga.
• Utanvegaakstur – lagalegt umhverfi og hvað er til ráða? Alda Hrönn Jóhannsdóttir, yfirlögfræðingur og staðgengill lögreglustjórans á Suðurnesjum.
• Stykkishólmsleiðin í sorphirðu og endurvinnslu. Erla Friðriksdóttir, bæjarstjóri.
• Vistvæn hönnun mannvirkja og vottun. Helga Jóhanna Bjarnadóttir, sviðsstjóri umhverfissviðs EFLU verkfræðistofu.
• Vistvæn innkaup og villtar auðlindir í atvinnulífinu. Finnur Sveinsson, ráðgjafi í innkaupa- og umhverfismálum.
• Samfélagsleg ábyrgð fyrirtækja – lúxus eða lífsnauðsyn? Þóranna Jónsdóttir, framkvæmdastjóri viðskiptaþróunar hjá Auði Capital.
• PM Endurvinnsla –  Skapandi útflutningsfyrirtæki með umhverfislegan ávinning. Haraldur Aikmann, framkvæmdastjórk PM endurvinnslu
• Umhverfisáhrif af fiskveiðum. Aðalbjörg Birna Guttormsdóttir, Ms í umhverfis- og auðlindafræði.
• Fiskveiðar - framtíðarsýn. Halla Jónsdóttir, verkefnisstjóri hjá Nýsköpunarmiðstöð Íslands.
• Sjálfbær ferðaþjónusta – hvar stöndum við í dag? Berglind Viktorsdóttir, MS í umhverfisfræðum og gæðastjóri Ferðaþjónustu bænda
• Fuglaskoðun og ferðamennska. Bryndís Reynisdóttir, ferða- og menningarmálafulltrúi Djúpavogs.