Hiti frá netþjónabúi nýttur til að hita sundlaug í Sviss

Hjá fyrirtækinu GI-services AG í Sviss hafa menn notað hitann frá netþjónabúi til að hita sundlaug. Sveitarfélagið í Uitikon tók þátt í kostnaði við búnaðinn en fær þá líka hlýja og góða laug í staðinn. Áður hafa einhverjir nýtt kælingu á slíkum stöðum í snjóbræðslu. Kannski Suðurnesjamenn fari að dæmi forfeðranna og hafi netþjónafjós á neðri hæð húsa sinna og baðstofu í risinu þegar öll orka verður farin í að knýja tölvur og álver.