Hollt nesti heiman að: Pítsa með grænmeti og klettasalati

Ef börnin mættu velja myndu þau mörg hver vilja pítsu í nestið á hverjum degi. Pítsa getur verið hollur kostur sé botninn úr grófu mjöli, sósan heimalöguð og gott grænmeti kemur í staðinn fyrir feitt kjötálegg. Það er líka óþarfi að drekkja þeim í osti. Tilvalið er að setja klettasalat ofan á.

Þessi pítsa er einkar næringarrík og bragðgóð. Grænmetispítsa býður upp á ógrynni af möguleikum þar sem allir geta sett á hana sitt uppáhaldsálegg. Heimatilbúin hvítlauksolía gerir svo gæfumuninn.

Deig

• 200 gr fínt spelt
• 150 gr gróft spelt
• 6 gr þurrger (rúmlega 1/2 þurrgersbréf)
• 1/2 tsk hunang
• 250 ml fingurvolgt vatn
• 2 msk jómfrúarólífuolía
• 1/2 tsk sjávarsalt

Leysið gerið upp ásamt hunanginu í um helmingi vatnsins. Leyfið því að standa í 10 mínútur. Setjið speltið í stóra skál, gerið góða holu í miðjuna og hellið gerblöndunni ofan í, ásamt ólífuolíu og sjávarsalti og bætið síðan við afganginum af vatninu. Hnoðið deigið lauslega í höndunum eða í hrærivél þar til það verður laust frá skálinni. Þekið með röku viskastykki og látið deigið hefast á hlýjum stað í um klukkustund, eða þar til deigið hefur tvöfaldað stærð sína. Fletjið deigið út, bætið spelti við eftir þörfum og setjið á bökunarplötu. Deigið dugar í 3 pítsur.

Pítsusósa

• 3-4 vel þroskaðir saxaðir tómatar
• 2 söxuð hvítlauksrif
• 1 rauð söxuð paprika
• 1 lítill rauðlaukur
• 2 msk ólífuolía
• 2 msk tómatpúrra
• 2 msk vatn
• sjávarsalt

Hitið olíuna við lágan hita, mýkið laukinn í 2-3 mínútur, bætið hvítlauk, tómatpúrru og papriku saman við og steikið í 3 mínútur í viðbót. Bætið við tómötum, salti og vatni og sjóðið áfram í 15 mínútur, hrærið í öðru hvoru. Ef vill þá er upplagt að mauka sósuna með töfrasprotanum.

Álegg

• paprika
• kúrbítur
• laukur
• ólífur
• þurrkað óreganó
• nýmalaður svartur pipar
• íslenskur mozzarellaostur í vatni eða ab-ostur
• klettasalat.

Kúrbíturinn er skorinn í þunnar sneiðar og brúnaður á þurru pönnunni. Paprika og laukur eru einnig skorin í þunnar sneiðar. Sósan er sett á deigbotninn, grænmetinu raðað ofan á, óreganói og slurki af svörtum pipar er stráð yfir. Að lokum er mozzarellaosturinn rifinn yfir pítsuna með fingrunum ásamt nokkrum dropum af ólífuolíu. Bakið við 220°C hita í 15-20 mínútur. Klettasalat er sett á pítsuna um leið og hún kemur út úr ofninum.

Hvítlauks- og chilíolía

• 100 ml jómfrúarólífuolía
• 1/2 ferskur rauður chilípipar, fræhreinsaður og smátt skorinn
• handfylli af saxaðri, ferskri, íslenskri steinselju

Öllu blandað saman og látið standa í klukkustund. Olían verður bara betri með hverjum deginum sem líður. Það eina sem þarf að passa er að hún standi ekki á björtum og hlýjum stað.

Uppskrift úr bókinni „Hollt nesti heiman að“ eftir Margréti Gylfadóttur, Sigurrósu Pálsdóttur og Sigurveigu Káradóttur.

Mynd: Forsíða bókarinnar. Mynd tekin af vef Bókaútgáfunnar Sölku ehf.