Mikilvæg svæði á miðhálendi Íslands fá vernd - stofnaður verði Hofsjökulsþjóðgarður

Drög að þingsályktunartillögu um vernd og nýtingu náttúrusvæða fela í sér mikilvægan sigur í baráttunni fyrir verndun náttúru Íslands. Við stofnun Náttúruverndarsamtaka Íslands árið 1997 var stofnun þjóðgarðs á miðhálendi Íslands meginmarkmið í stefnu samtakanna. Þingsályktunartillagan er stórt skref í þá átt. Við blasir að stofnaður verði Hofsjökulsþjóðgarður* með Þjórsárver í suðri (Norðlingaölduveita hefur loks verið slegin af),** Kerlingafjöll í vestri. Guðlaugstungur norðan Hofsjökuls hafa þegar verið friðlýstar. Samkvæmt tillögunni verða öll þessi svæði vernduð. Næsta skref er að bæta við Jökulsám Skagafjarðar og Hveravallasvæði, sem sett voru í biðflokk.

Nýlega var Langisjór friðlýstur sem hluti af Vatnajökulsþjóðgarði.

Önnur mikilvæg svæði í verndarflokki eru Torfajökulssvæði (þegar friðland), Jökulsá á Fjöllum (hluti af Vatnajökulsþjóðgarði), Vonarskarð, Ölkelduháls (Bitruvirkjun) og Gjástykki.

Sterk rök hníga að því að stofnaður verði eldfjallaþjóðgarður á Reykjanesskaga. Ekki ólíkt miðhálendi Íslands er Reykjanesskagi einstakt svæði á heimsvísu. Náttúruverndarsamtök Íslands gagnrýna að svæði á borð við Sveifluháls og Stóra-Sandvík eru í tillögunni sett í nýtingarflokk.

Náttúruverndarsamtökin gagnrýna að virkjanir í Skjálfandafljóti skulu ekki hafa verið slegnar af og settar í verndarflokk.

Náttúruverndarsamtök Íslands lýsa andstöðu sinni við virkjanir í neðri Þjórsá.

*Upphaflega lagði Hjörleifur Guttormsson fram þingsályktunartillögu um stofnun þjóðgarða út frá helstu jöklum á miðhálendi Íslands.
** Baráttan fyrir verndun Þjórsárvera hefur staðið í rúma fjóra áratugi með sigri náttúruverndarsinna