Með náttúrunni – Gunnsteinn Ólafsson í eldlínunni - 2. þáttur

Komið þið sælir kæru náttúruunnendur!

Gunnsteinn Ólafsson tónlistarmaður er einn níumenninganna sem seint á síðasta ári voru dæmdir fyrir mótmæli við vegalagningu í Gálgahrauni, í október 2013. Þessar vikurnar segir hann frá því hér í Grænvarpi Náttúran.is hvers vegna hann tók þátt í mótmælum við vegagerð gegnum hraunið, aðgerðunum, framkomu lögreglu, fangelsisvist, dómnum og áfrýjun til Evrópudómstólsins.

Útdráttur úr viðtalinu

Við náttúruverndarsinnar erum engir vegaverkfræðingar, segir Gunnsteinn. Okkar hlutverk er að standa vörð um náttúruna, aðrir eiga að reikna út kostnað við vegagerðina og annað sem henni viðkemur. Framkvæmdin var meingölluð og allar ákvarðanir henni tengdar teknar á kostnað náttúrunnar. Í umhverfismati var ekki farið yfir örnefnaskrá né gengið um svæðið og þeir sem afgreiddu leyfin höfðu ekki komið á staðinn.

Vissu ekki að Kjarval málaði í hrauninu

Garðbæingar eða yfirvöld þar vissu ekkert um dvöl Kjarvals í hrauninu í 25 ár né um þær fjölmörgu myndir sem hann málaði þar. Vegna ábendingar Hraunavina var hætt við að byggja þrjár risastórar villur á svæðinu og klettunum hlíft. Engu að síður er  risastór bygging  við hliðina á þeim. Einhverjir segja að kaupa ætti húsið fyrir safn um Kjarval. Margar myndir sem Kjarval málaði í Gálgahrauni eru sagðar vera frá Þingvöllum því þær ku seljast betur.

Við Hraunavinir höfum komið með fjölmargar tillögur um hvernig nýta megi hraunið. Gamlar þjóðleiðir liggja um það,  meðal annars Fógetastígur sem telst til meiriháttar fornminja. Hann er í þeim hluta Gálgahrauns sem friðaður er. Garðbæingar mega eiga það að þeir hafa friðað hluta hraunsins en sjá í hyllingum möguleika á að byggja í hrauninu fyrir sunnan hinn nýja Álftanesveg enda er haunið þar ekki friðað, heldur aðeins á náttúruminjaskrá. Náttúruminjaskrá tryggir því miður ekki að land sleppi undan eyðileggingu. Við höfum bent á að það væri upplagt að hafa hús við  Garðastekk þar sem skólabörn fengju fræðslu um náttúru og sögu hraunsins. Þó það séu alltaf einhverjir á göngu í hrauninu má nota það mikið meira en gert hefur verið. Sjúkraþjálfarar hafa sagt fólki að nota hraunið til gönguferða því það geri manni gott að ganga á misjöfnu landi. Mér kemur alltaf jafn mikið á óvart, segir Gunnsteinn, hvað maður er einn í hrauninu,  það er eins og maður sé uppi á öræfum. Algjör þögn og kyrrð ríkir. Maður er einn með sjálfum sér – inni í miðri borg.

Steinunn Harðardóttir.

Náttúruverndarsjóður Pálma Jónssonar styrkir þáttagerðina.

Hlusta á þáttinn.