Almanak SORPU 2015

Frá árinu 2006 hefur SORPA gefið út almanak sem notið hefur mikilla vinsælda. Ákveðið þema er tekið fyrir á hverju ári en alltaf er unnið út frá því að verkin tengist endurvinnslu eða endurnýtingu á einhvern hátt. Almanakinu er ætlað að vekja fólk til umhugsunar og sýna fram á að í úrgangi leynast verðmæti sem geta orðið að einstökum  listaverkum, nýjum vörum og umbúðum við endurvinnslu.

Almanak ársins 2015 er unnið í samstarfi við Hlutverkasetur og urðu verkin sem sjá má á síðum þess til í listasmiðjuviku í september 2014. Hugmyndir verkanna kviknuðu m.a. við skoðun á því sem til fellur á heimilum þátttakenda, því sem fannst í Góða hirðinum í skoðunarferð þangað og í ferð sem farin var í Laugarnesið. Þátttakendur lærðu ýmsar þrykkaðferðir og eru myndverkin í almanakinu unnin með þrykkskapalónum sem eru t.d. gerð úr klósettrúllum, kartoni, strokleðrum, garni, lími, álpappír og plasti. Einnig er þrykkt með laufblöðum, kartöflum og smáhlutum eins og t.d. málningartúpum á mismunandi efnivið.
Þátttakendur listasmiðjunnar komust að því að fegurð hlutanna liggur í upplifun hvers og eins. Umhverfið er uppspretta hugmynda og úrgangur eins getur verið efniviður í sköpun annars. Fegurðin getur leynst þar sem hennar er síst að vænta og það er okkar að koma auga á hana og miðla henni áfram til annarra í gegnum verk okkar.

Almanaki fæst gefins á móttökustöðum SORPU.

Á Endurvinnslukortinu hér á vefnum finnur þú alla móttökustaði SORPU.

Skoða almanak SORPU 2015.