Nýtnivikan

Lýst er eftir viðburðum í Nýtniviku

Lýst er eftir þátttakendum og viðburðum sem tengjast því að draga úr matarsóun. Áhugasamir eru hvattir til að setja upp viðburð eða láta vita af viðburði sem fer fram á meðan á Nýtnivikunni stendur og tengist matarsóun á einhvern hátt. Hægt er að skrá viðburðinn (viðburðina) beint á vefsíðu evrópsku nýtnivikunnar eða senda póst á netfangið nytnivika@reykjavik.is  Skráðir viðburðir verða birtir á vefsíðu Reykjavíkurborgar og kynntir þar.

Zero Waste hópurinn (Landvernd, Kvenfélagasamband Íslands og Vakandi) og Norræna húsið standa fyrir málþingi um matarsóun 25. nóvember sem verður auglýst nánar síðar á matarsoun.is.

Reykjavíkurborg stendur fyrir ljósmyndasamkeppni þar sem þemað er „nýtum matinn betur“. Þar geta allir tekið þátt og sett inn mynd sem lýsir góðri nýtingu á mat  eða frumleg hugmynd að því hvernig gott er að nýta matarafganga.  Leiðbeiningar vegna keppninnar verða kynntar nánar á reykjavik.is

Reykjavíkurborg hvetur alla til að draga úr matarsóun og nýta matinn betur. Hér að neðan eru nokkur heilræði sem hægt er að styðjast við.

Áður en þú ferð út í búð:

• Skrifaðu niður innkaupalista. Vertu viss um að kaupa aðeins það sem þú þarft til að koma í veg fyrir kaup á mat sem rennur út áður en hans verður neytt.
• Skoðaðu í skápana og ísskápinn áður en þú ferð. Þá færðu tilfinningu fyrir hvaða matur er til á heimilinu og hvað vantar.
• Sestu niður með fjölskyldunni og gerið saman matseðil fyrir vikuna. Þetta kemur í veg fyrir innkaup á óþarfa mat.

Í búðinni:

• Mundu eftir að fara eftir innkaupalistanum og ekki fylla körfuna af mat sem þú þarft ekki á að halda. Innkaup á mat á tilboðsverði er bara ódýrara ef maturinn nýtist.
• Velja mat eftir magni þar sem kostur er, t.d. kauptu grænmeti og ávexti í stykkjatali eða kauptu kjöt og fisk eftir þyngd. Þannig minnka umbúðir sem fylgja þér heim og auðveldara er að velja það magn sem þú þarft.
• Líttu á hvenær vara rennur út.
• Búðarferð er best á fullum maga. Smá snarl áður en haldið er í búðina dregur úr líkum á því að einhver óþarfi sé keyptur.

Þegar þú kemur heim:

• Gott er að skipuleggja skápana og ísskáp og gæta þess að geyma vörur á réttum stað við rétt hitastig.
• Settu nýjustu vöruna aftast og eldri birgðir af mat fremst. Ítarlegar upplýsingar um hvernig má draga úr matarsóun með geymsluaðferðum.
• Það er auðvelt að nýta matarafganga. Ef þú ert ekki viss hvernig best er að nýta afganga er hægt að skrá sig á námskeið hjá Zero Waste hópnum gegn vægu gjaldi sem heitir„Eldað úr öllu með kvenfélögunum og Dóru“. Nánari upplýsingar á vef leiðbeiningarstöðvar heimilanna.
• Gott er að eiga plastbox, glerkrukkur eða önnur ílát sem handhægt er að setja matarafganga í til geymslu eða til að taka með sér í skólann eða vinnuna.