Yfirlýsing Breytenda vegna fyrirhugaðrar olíuvinnslu á drekasvæðinu

Á sumardaginn fyrsta ætla Breytendur - Changemaker Iceland að hefja herferð sína gegn olíuvinnslu við Íslandsstrendur. Við byrjum herferðnina með gjörningi og mótmælagöngu þar sem við bjóðum gestum og gangandi að fylgjast olíuhungrinu grípa um sig og umbreyta ósköp venjulegum íslendingum í uppvakninga. Gróðavonin sem heltekið hefur marga íslendinga virðist nefninlega hafa svipuð áhrif og skæðasti zombí-vírus; yfirtekur skynsemi og rökhugsun og skilur aðeins eftir löngun í meira og olíuglampa í augum.

Siðferðislega óréttlætanlegt er að hefja vinnslu á olíu nú þegar ljóst er hve alvarlegum loftslagsbreytingum hnötturinn stendur frammi fyrir. Fyrir þeim sem smitaðir eru af olíuvírusnum er hlýnun jarðar þó ekki vandamál – ekki á meðan von er á skammtímagróða fyrir okkur íslendinga. Takmark gjörningsins er að láta skynsemisröddina heyrast: Olíuvinnsla við Ísland er alger fásinna!

Gengið verður af stað frá Hallgrímskirkju, gengið niður Skólavörðustíg og endað á Austurvelli þar sem lesin verður herferðaryfirlýsing Breytanda.

Olíulotterí Íslands – sparigrís eða feigðarflan?

Breytendur – Changemaker Iceland eru hreyfing rekin af ungu fólki sem vinnur að jöfnuði og sanngirni í heiminum öllum. Í ár hyggjumst við vekja athygli á neikvæðu hliðum þess að íslendingar leggi í olíuvinnslu.
Til að hnattræn hlýnun haldist undir tveggja gráðu mörkunum – sem talið er algert hámark  -má ekki brenna meira en 30% af allri þeirri olíu sem þegar hefur verið fundin. Gríðarlega óábyrgt verður að teljast að Ísland – iðnvætt og vel stætt land – ætli sér að hefja olíuvinnslu með gróðavon í huga án tillits til hins hnattræna samhengis. Ef raunverulegur vilji væri til þess að ná markmiðum um að draga úr losun gróðurhúsalofttegunda væri olíuvinnslu á Drekasvæðinu sjálfhætt. Hinsvegar er staðan sú að enginn flokkur á Alþingi tekur skýra afstöðu gegn vinnslunni.  Því viljum við breyta!

Hlýnun jarðar er mannréttindamál

Hlýnun jarðar veldur því að eyðimerkur stækka sem aldrei fyrr, jöklar bráðna og sjávarmál hækkar þannig að láglendi og eyjur víða um heim eru að fara í kaf . Spár um hversu margir munu hafa þurft að yfirgefa heimili sín vegna loftslagsbreytinga hljóma bjartsýnast upp á 25 milljónir manns, svartsýnast á einn milljarð.  Því lítum við á hlýnun jarðar sem mannréttindamál.

Umhverfisslys á norðurslóðum – Enn meiri hætta!

Drekasvæðið liggur norðan við heimskautabaug.  Mikið dýpi sjávar, slæm birtuskilyrði og fjarlægð frá landi gera það að verkum að stórfegnlega erfitt og jafnvel ómögulegt verður að ná stjórn á aðstæðum ef að eitthvað fer úrskeiðis. Samkvæmt þeim takmörkuðu heimildum sem til eru um svæðið er það mikilvægt fæðusvæði fyrir lífverur sem lifa á dýrasvifi, sérstaklega síld, loðnu og hval. Slys á þessu svæði myndi því hafa áhrif á fiskistofna í kringum íslandsstrendur og mögulega bitna á sjávarútveginum, einni af stærstu atvinnugreinum á Íslandi.  Þess vegna teljum við að hætturnar sem fylgja því að bora eftir olíu á drekasvæðinu séu meiri en ágóðinn.

Óvís gróði – mikil áhætta

Það færir okkur að gróðahliðinni. Hver er þessi gífurlegi gróði sem sífelt er verið að ræða? Svarið við þeirri spurningu er nokkuð flókið, enda er gróðinn af olíuvinnslu miðaður við að núverandi markaðsumhverfi haldist í sömu mynd um ókomna framtíð. Ef stjórnvöld reikna með að COP ráðstefnurnar skili árangri og að bindandi lög um þak á útblástur gróðurhúsalofttegunda verði innleidd fyrir 2020  er olíuvinnsla sem skilar ekki hagnaði fyrr en eftir mörg ár af rannsóknum og framkvæmdum ekki mjög arðbær. Við teljum að með því að spila í olíulotteríinu verði íslendingar hluti af vandamálinu þegar við gætum svo auðveldlega verið partur af lausninni!

Ísland – Lausnaeyjan!

Ísland hefur mörg tækifæri til að verða hluti af lausninni. Það er nóg til af tækifærum til að hafa sterkann grænann iðnað á landinu ef viljinn er fyrir hendi. Landsvirkjun hefur þegar sett upp tvær vindmyllur og ætlar sér að setja upp fleiri , gróðurhús sem gætu uppfyllt grænmetisþörf landans er á hugmyndastigi  og repja vex auðveldlega á íslandi svo eitthvað sé nefnt . Breytendur hvetja stjórnvöld til að ýta frekar undir grænan iðnað en olíuvinnslu. Með því að segja nei við olíuvinnslu senda stjórnvöld mikilvæg skilaboð um að Ísland vilji vera í fararbroddi í umhverfismálum. Við viljum sjálfbærar lausnir til framtíðar frekar en skaðlegar skammtímalausnir. Við viljum olíulaust Ísland!

Ljósmynd: Olímengun, af Treehugger.com.