Rafbíll ekki sá umhverfisvænsti

Toyota Prius C er umhverfisvænastur bíla 2013 að mati ACEEE, American Council for an Energy Efficient Economy, óháðra samtaka sem árlega gefa út lista yfir umhverfisvænustu bíla ársins. Toyota Prius C er tvinnbíll en fast á hæla hans kemur Honda Fit EV sem er rafdrifinn bíll. Þriðja sætið verma þrír bílar; Toyota Prius, Prius PHV og Honda Civic Hybrid.

En hvernig getur tvinnbíll verið „grænni“ en bíll sem gengur fyrir rafmagni? Svarið er að finna í talnafræðinni.

Samtökin skoðuðu útblástur bílanna, mengandi útblástur og gróðurhúsalofttegundir, auk losunar frá þjónustufyrirtækjunum sem hlaða rafbíla. Þá var einnig tekin til greina orkan sem fer í að framleiða bílinn og áhrif sem förgun bílsins hefði á náttúruna þegar tíma hans lyki. Þegar öll kurl voru komin til grafar stóð bíll, sem bæði er drifinn með rafmagni og eldsneyti, uppi sem sá grænasti.

Úttektina má lesa á vef breska ríkisútvarpsins, www.bbc.co.uk, og þar er einnig hægt að nálgast listann yfir bílana sem athugaðir voru.