Skapandi auðlindasýn - Málþing í aldarminningu Kristjáns Friðrikssonar

Málþing í aldarminningu Kristjáns Friðrikssonar verður haldið í fyrirlestrasal Þjóðminjasafnsins þ. 9. nóvember kl. 14:00.

Í ár eru liðin 100 ár frá fæðingu Kristjáns Friðrikssonar iðnrekanda. Hann var sveitadrengur sem kom til borgarinnar og lét að sér kveða á uppgangsárum lands og þjóðar, þekktur fyrir hugmyndaauðgi og framkvæmdagleði. Hann gaf út Útvarpstíðindi, skrifaði bækur m.a. um hagfræði, grasafræði og myndlist, setti á stofn klæðagerðina Últímu og síðar vefnaðarverksmiðju og ferðaðist um land til að ræða sjálfbæra fiskveiðistjórnun og auðlindanýtingu. Í fjölbreytilegu starfi hans mótaðist sýn sem enn í dag má kallast frjó.

• Á málþingi í fyrirlestrasal Þjóðminjasafns Íslands verður farið yfir framsýnar hugmyndir Kristjáns Friðrikssonar á sviði auðlindahagfræði og sjálfbærni, list- og iðnhönnunar, skapandi skólastarfs og útgáfu.
• Haraldur Ólafsson mannfræðingur rifjar upp hugmyndir Kristjáns um farsældarríki og manngildisstefnu;
• Daði Már Kristófersson hagfræðingur fjallar um hugmyndir Kristjáns um fiskveiðistjórnun, auðlindaskatt, líf- og hagkeðju sem kallast á við sjálfbærnihugsjón samtímans;
• Ingibjörg Jóhannsdóttir skólastjóri Myndlistaskólans í Reykjavík ræðir skapandi skólahugmyndir Kristjáns, lífrænt skólastarf og samþættingu hugar og handar; Friðrik Daníelsson efnaverkfræðingur segir sögu af seinustu iðnaðaráformum Kristjáns;
• Oddný Eir Ævarsdóttir rithöfundur gluggar í Útvarpstíðindin og uppeldisbækurnar.

Jón Sigurðsson, fyrrverandi rektor á Bifröst, vinur og samstarfsmaður Kristjáns setur hugmyndir og æviatriði hans í samhengi og stýrir fundi.

Boðið verður upp á kaffi að dagskrá lokinni og vonast eftir líflegum umræðum!

Aðgangur frír og allir hjartanlega velkomnir!

Grafík: Hagkeðjan í hnotskurn kom út árið 1978 en þar útlistar Kristján kenningar sínar um efnahags- og atvinnumál á Íslandi. Sækja ritið hér.

Sjá nánar um Kristján Friðriksson hér.