Sóley organics komið á markað

„Sóley” – spánný íslensk húðsnyrtivörulína, sem er 100% náttúruleg, umhverfisvæn og án allra óæskilegra aukaefna, er nú komin á markað á Íslandi. “Sóley” samanstendur af eyGLÓ andlitskremi, fersk andlitsfroðu, nærð hreinsivatni, hrein andlitsmjólk, mjúk líkamsskrúbbi og GRÆÐIR fjölskyldusjampói, ásamt birkiR, sérstakri herrasápu fyrir húð og hár.

Uppistaðan í “Sóley” eru kraftmiklar villtar íslenskrar jurtir, þar með talið handtínt birki og vallhumall sem saman mynda grunninn í allri nýju húðsnyrtivörulínunni. Þann grunn sótti Sóley Elíasdóttir, eigandi og stofnandi “Sóley”, í aldagamla uppskrift sem varðveist hefur í fjölskyldu hennar til dagsins í dag.

“Sóley” húðsnyrtivörurnar eru framleiddar hjá Fagvörum ehf., matvælaframleiðslufyrirtæki í Hafnarfirði, sem kemur heim og saman við hugsun nútímans sem er á þá lund að allt sem þú berð á húð þína áttu einnig að geta borðað, þótt ekki sé mælt sérstaklega með því. Að auki vinnur “Sóley” nú með alþjóðlegri markaðsstofu í London sem hyggst koma vörum hennar á framfæri erlendis en mikill áhugi er á hreinum húðsnyrtivörum með íslenskum lækningajurtum víða.

Heilsa ehf sér um dreifingu á “Sóley” húðsnyrtivörulínunni. “Sóley” húðsnyrtivörurnar fást í verslunum Lyfju um land allt og í Heilsuhúsinu í Reykjavík, Kópavogi og á Akureyri.