Samtök um bíllausan lífsstíl er hópur fólks sem hefur að sameiginlegu áhugamáli að vinna að því að gera bíllausan lífsstíl á höfuðborgarsvæðinu að vænlegri kosti en nú er. Samtökin halda aðalfund sinn í kvöld kl. 20:00 á efri hæð Sólon.

Stjórnarmeðlimir munu kynna starfsemi félagsins í vetur og þau verkefni sem nú eru á döfinni, en auk þess verða þrjú einkar áhugaverð erindi:
  1. Sesselja Traustadóttir mun flytja erindið: "Hjólafæri á göturnar".
  2. Þorstein R. Hermannsson höfundur samgöngustyrkja Mannvits mun kynna verkefnið.
  3. Katrín Anna Lund, mannfræðingur og lektor við HÍ mun kynna rannsóknir sínar á samskiptum farþega í Belfast og heimfæra á Reykjavík.

Sjá vef samtakanna billaus.is.

Sjá nánar um Samtök um bíllausan lífsstíl:

Samtök um bíllausan lífsstíl er hópur fólks sem hefur að sameiginlegu áhugamáli að vinna að því að gera bíllausan lífsstíl á höfuðborgarsvæðinu að vænlegri kosti en nú er.

Tilgangurinn er margþættur, allt frá því að hafa jákvæð áhrif á nærumhverfið og draga úr útblástursmengun og yfir það að skapa líflegra og mannvænna borgarumhverfi.

Í hópnum er fólk sem bæði lifir bíllausum lífsstíl og þeir sem gjarnan vildu gera það, ef aðstæður til þess væru betri.

Hópurinn er þverpólitískur, og leggur því meiri áherslu á að berjast fyrir réttindum þeirra er kjósa sér bíllausan lífsstíl fremur en sértækum og hugsanlega umdeilanlegum lausnum.

Hópurinn mun því berjast fyrir eftirfarandi atriðum:
  • að borin sé virðing fyrir almannarými á borð við gangstéttir og torg, og að sektir fyrir ólöglega lögðum faratækjum séu sambærilegar á við það sem gerist í nágrannaborgum og að sektað sé allan tíma sólarhringsins,
  • að gætt þess verði að stofnæðar trufli sem minnst nærliggjandi byggð,
  • að draga úr niðurgreiðslum til handa bílandi á formi gjaldfrjálsra bílastæða við stofnanir, verslanir og fyrirtæki, óbeinnar gjaldtöku af umferðarmannvirkjum og hverju því sem dregur úr samkeppnishæfni annarra valkosta við einkabílinn,
  • að hvetja til þess að lagðir séu göngustígar og hjólabrautir með sambærilegum metnaði og götur fyrir bíla,
  • að umferðaræðar verði skipulagðar sem breiðstræti ekki síður en hraðbrautir þar sem við á,
  • að almenningssamgöngur fái sérakreinar á stofnæðum þar sem hætta er á biðraðamyndun og töfum,
  • að lögð verði enn meiri áhersla á skjólmyndun með trjágróðri en nú er.


Hópurinn mun einnig kynna kosti þess að lifa bíllausum lífsstíl fyrir þá sem ekki gera það í dag, hvaða áhrif það hefur á líf þess og nærumhverfi og hvetja fólk til að breyta um lífsstíl eftir fremsta megni.

Grafík: Bílar, barn og maður. Guðrún Tryggvadóttir og Signý Kolbeinsdóttir.

Birt:
28. maí 2009
Tilvitnun:
Guðrún Arndís Tryggvadóttir „Aðalfundur samtaka um bíllausan lífsstíl“, Náttúran.is: 28. maí 2009 URL: http://nature.is/d/2009/05/28/aoalfundur-samtaka-um-billausan-lifsstil/ [Skoðað:28. mars 2024]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.
breytt: 25. september 2010

Skilaboð: