Að ræna Héraðsvötnum - Fundur Áhugahóps um verndun Jökulsánna í Skagafirði vel sóttur

Rúmlega tvö hundruð manns sóttu baráttufund fyrir verndun Jökulsánna í Skagafirði sem haldinn var í félagsheimilinu Árgarði, þriðjudagskvöldið, 28. 11. 2006 og var þar með orðinn húsfyllir. Á fundinum voru flutt erindi um náttúru, virkjanamál og framtíð Skagafjarðar og Sigurður Hansen bóndi og skáld í Kringlumýri flutti ljóð.

Fundurinn samþykkti ályktun um að skora á sveitarstjórnir Sveitarfélagsins Skagafjarðar og Akrahrepps að gera ekki ráð fyrir virkjunum í Jökulsám Skagafjarðar í tillögum að aðalskipulagi.

 

Að sögn þeirra sem að fundinum stóðu virðist sem mikill áhugi sé á málefninu og mikil andstaða gegn Villinganes- og Skatastaðavirkjun, bæði innan héraðs sem utan. Fólk er ekki tilbúið að fórna náttúru Skagafjarðar. Einnig eru fleiri og fleiri að að átta sig á því að ekkert bendir til þess að virkjanirnar verði til þess að auka atvinnumöguleika í Skagafirði.
-
Myndin er frá fundinum. Ljósmynd: dorimagg.
www.jokulsar.org.