Það besta sem náttúran hefur upp á að bjóða

Orð dagsins 30. maí 2008

Lífhermun (e: Biomimicry) felur í sér mikla nýsköpunarmöguleika. Þannig getur stýring hnúfubaka á eigin hjartslætti kennt mönnum nýjar leiðir í hönnun hjartagangráða, vængir eyðimerkurbjöllu fela í sér vísbendingar sem gætu leitt til framfara í söfnun vatns - og þurrkþolin upprisuplanta í Afríku getur kennt mönnum að geyma bóluefni án þess að setja þau í kæli.

Þetta eru aðeins þrjú dæmi af mörgum, sem hvert um sig gæti leitt til sparnaðar upp á fleiri milljarða íslenskra króna, auk þess að vera umhverfisvænni en þær aðferðir sem nú er beitt. Nýir möguleikar af þessu tagi voru til umfjöllunar í verkefninu "Nature's 100 Best", sem Achim Steiner, framkvæmdastjóri Umhverfisstofnunar Sameinuðu þjóðanna (UNEP) kynnti í tengslum við 9. fund aðildarríkja Samningsins um líffræðilega fjölbreytni, sem lýkur í Bonn í dag.

Tækifærin sem liggja í lífhermun þykja einkar gott dæmi um efnahagslegt mikilvægi líffræðilegrar fjölbreytni. Lesið frétt PlanetArk/Reuter í gær