Grænu svæðin mikils metin í Reykjavík

86% Reykvíkinga segja að græn svæði í borginni skipti þá miklu máli. Fjölmennar fjölskyldur og íbúar í Miðborg og Vesturbæ kunna best að meta svæðin. Þetta kemur fram í könnun sem Umhverfis- og samgöngusvið Reykjavikurborgar lét gera í október. Einnig var spurt um dýrahald og gjald á notkun nagladekkja.

„Það er sannarlega gaman að sjá hvað græn svæði borgarinnar skipta Reykvíkinga miklu máli," segir Karl Sigurðsson formaður umhverfis- og samgönguráðs Reykjavíkurborgar og spáir því að líflegar umræður geti skapast um gjaldtöku nagladekkja þegar farið verður í að skoða hana. Könnunin leiddi í ljós að fleiri eru hlynntir gjaldi á notkun nagladekkja í Reykjavík en andvígir. 45% segjast hlynntir slíku gjaldi, 43% eru andvígir því og rúmlega 12% taka ekki afstöðu. Aldur og menntun hefur áhrif á viðhorf til gjaldtöku. Því eldir og því meiri menntun aðspurðra því hlynntari eru þeir gjaldi.

Tvær spurningar í þessari könnun falla undir dýrahald í Reykjavík. Aðeins 30% aðspurðra eru hlynntir lausagöngu katta í Reykjavík en 51% eru henni andvígir. Lausir kettir njóta umburðarlyndis íbúa í Miðborginni, Vesturbæ og Breiðholti en flestir aðspurðra í Grafarvogi og á Kjalarnesi eru andvígir lausagöngu katta.

Þá var spurt í könnuninni um viðhorf til þess hversu vel eða illa hundaeigendur fari eftir reglum um hundahald og töldu 48% aðspurðra að þeim reglum væri illa fylgt. 38% töldu aftur á móti að hundaeigendur standi sig vel gagnvart reglunum. Áberandi er að íbúar í Árbæ og Grafarholti telja að hundaeigendur fylgi reglunum illa eða 60%.

Spurningar Umhverfis- og samgöngusviðs Reykjavíkurborgar voru hluti af netkönnun sem Capacent framkvæmdi dagana 1. – 18. október 2010. Úrtakið var 1.174 og var svarhlutfallið tæplega 77%. Spurningarnar hljómuðu á þessa leið:  Hversu miklu eða litlu máli skipta grænu svæðin í borginni þig? Hversu hlynnt(ur) eða andvíg(ur) ertu lausagöngu katta í Reykjavík? Hversu vel eða illa finnst þér hundaeigendur í Reykjavík fara að reglum um hundahald? Hversu hlynnt(ur) eða andvíg(ur) ert þú því að ökumenn í Reykjavík greiði sérstakt gjald fyrir að nota nagladekk?

Ný könnun með spurningum um umhverfismál.

Sjá almenningsgarði og afþreyingarsvæði í Reykjavík hér á vefútgáfu Græna Reykjavíkurkortsins.

Ljósmynd: Skilti að Grasagarðinum í Reykjavík, hannað af Árna Tryggvasyni.