Leggja til samræmt norrænt bann við notkun á trasfitusýru

Norðurlandaráð vill að Norðurlöndin fylgi fordæmi Dana og banni matvæli sem innihalda meira en 2 prósent af transfitusýrum.

Þetta kemur fram í tilkynningu frá Norðurlandaráði en þar er sagt að aðferðin við að takmarka transfitusýru í matvælum sé einföld til að koma í veg fyrir hjarta- og æðasjúkdóma.

Tillagan var samþykkt á þingi Norðurlandaráðs í Helsinki í dag.

Þá kemur fram að minnkun notkunar á transfitusýrum ætti að verða innan fimm ára og þingmennirnir (á þingi Norðurlandaráðs sem nú stendur yfir) vilja að norrænu ríkisstjórnirnar beiti þrýstingi innan ESB og í EES löndunum um að þau setji sömu reglur.

Að auki leggja þeir til að matvæli sem ekki innihalda transfitusýrur verði merkt sérstaklega.

„Það er mikilvægt að Norðurlöndin gangi á undan með góðu fordæmi á þessu sviði. Bann við transfitusýrum getur verið öðrum innblástur – meðal annars ESB og EES-svæðinu”, segir Henrik Dam Kristensen, fulltrúi í flokkahópi Jafnaðarmanna og neytendanefnd Norðurlandaráðs í tilkynningunni.

Fram kemur að Danir samþykktu lög um takmörkun á transfitusýrum við tvö prósent, árið 2004. Brot á lögunum getur haft í för með sér allt að tveggja ára fangelsi.

„Árangurinn er sá að í dag er innihald transfitusýra í matvælum í Danmörku mjög lágt miðað við hin Norðurlöndin. Lögin hafa meðal annars haft í för með sér að New York borg hefur samþykkt svipað bann í þeim 25.000 veitingahúsum sem eru í borginni,“ segir í tilkynningunni.

Mynd: VB