Lífrænn markaðsdagur á Sólheimum

Laugardaginn 8. ágúst verður hinn árlegi markaðsdagur Sólheima þar sem fram fer kynning og sala á lífrænt ræktuðu grænmeti frá Garðyrkjustöðinni Sunnu á Sólheimum ásamt ýmsu lífrænu góðgæti frá Engi, Hæðarenda og fleirum. Nærandi, hin nýja brauð- og matvinnsla Sólheima, mun einnig bjóða upp á ný bakað, lífrænt brauð og annað góðgæti. Markaðurinn er á Rauða torginu fyrir framan Verslunina Völu, listhús og í versluninni sjálfri.

Í skógræktarstöðinni Ölri verða ,,Reynidagar” þar sem reyniplöntur verða seldar með 35% afslætti. Leiðsögn um trjásafn Sólheima verður kl. 12:30 undir handleiðslu Særúnar Stefánsdóttur, forstöðukonu Ölurs.

Í kaffihúsinu Grænu Könnunni verður m.a. hægt að kaupa sér gómsæta framandi grænmetisrétti sem hinn rómaði kokkur Þórir Bergsson á Grænum Kosti framreiðir.Aðgangur er ókeypis og opnartímar eru kl. 12:00 – 18:00.

Myndin er af brokkolíhaus. Ljósmynd: Guðrún Tryggvadóttir.