Ísland tók við formennsku í vinnuhóp Norðurskautsráðsins um vernd lífríkisins (CAFF) á ráðherrafundi Norðurskautsráðsins, sem haldinn var í Tromsö í Noregi 29. apríl sl. Ævar Petersen, fuglafræðingur hjá Náttúrufræðistofnun Íslands, er ný r formaður vinnuhópsins.

Að sögn Ævars verður unnið að tveimur stórum verkefnum innan CAFF í formennskutíð Íslands 2009-2011. Annars vegar vöktun á líffræðilegum fjölbreytileika á norðurslóðum (Circumpolar Biodiversity Monitoring Program), sem m.a. á að vakta áhrif loftslagsbreytinga á vistkerfið, en loftslagsbreytingar eru örari á Norðurskautssvæðinu en á flestum öðrum stöðum á jörðinni. Hins vegar er um að ræða stöðuskýrslur um líffræðilegan fjölbreytileika (Arctic Biodiversity Assessment). Skýrslurnar verða notaðar í vinnu við að hamla gegn eyðingu líffræðilegrar fjölbreytni sem ýmsir alþjóðasamningar fjalla um. Tveir sérfræðingahópar starfa á vegum CAFF, annar um gróður á norðurslóðum og hinn um sjófugla.

Fundurinn í Tromsö var 7. ráðherrafundur Norðurskautsráðsins, en þeir eru haldnir á tveggja ára fresti. Að þessu sinni sótti Ásta Ragnheiður Jóhannesdóttir, félagsmálaráðherra, fundinn fyrir Íslands hönd. Átta ríki eiga sæti í Norðurskautsráðinu, auk fulltrúa samtaka frumbyggja. Sex vinnuhópar starfa á vegum Norðurskautsráðsins, flestir á sviði umhverfisverndar og eru skrifstofur tveggja þeirra á Íslandi, nánar tiltekið á Akureyri. Auk CAFF er þar líka skrifstofa PAME, starfshóps um verndun umhverfis hafsins.

PAME kynnti á fundinum nýja úttekt á siglingum, sem sýnir að skipaumferð hefur vaxið verulega á Norðurslóðum og mun væntanlega halda áfram að vaxa, þ.á m. á sjálfu N-Íshafinu þvert yfir Norðurpólinn. Einnig er í skýrslu PAME að finna ýmsar tillögur um hvernig auka megi öryggi varðandi siglingar á svæðinu og efla viðbúnað við hugsanlegum óhöppum.

Myndin er af Ævari Petersen fuglafræðingi, ný skipuðum formanni vinnuhópsins. Umhverfisráðuneytið.
Birt:
May 4, 2009
Tilvitnun:
Umhverfisráðuneytið „Ísland tekur við formennsku í vinnuhóp um vernd lífríkis Norðurslóða“, Náttúran.is: May 4, 2009 URL: http://nature.is/d/2009/05/04/island-tekur-vio-formennsku-i-vinnuhop-um-vernd-li/ [Skoðað:May 20, 2019]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.

Messages: