Ellefta landsráðstefna Staðardagskrár 21 á Íslandi var sett í Stykkishólmi í gær. Hundrað þátttakendur voru skráðir til þátttöku á ráðstefnunni og er hún því sú fjölmennasta hingað til.

Kolbrún Halldórsdóttir umhverfisráðherra sagði í setningarávarpi að mikið hefði áunnist á þeim tíu árum sem liðin eru frá því að Staðardagskrárstarfið á Íslandi hófst fyrir alvöru með ráðningu verkefnisstjóra á vegum umhverfisráðuneytisins og Sambands íslenskra sveitarfélaga. Umræðan um umhverfismál hefði breyst og augu mann hefðu opnast í auknum mæli fyrir því hvernig þau væru óhjákvæmilega samofin samfélagsmálum og efnahagsmálum. Hún sagði þessa heildstæðu sýn vera kjarna sjálfbærrar þróunar og á þeim kjarna þyrfti að klifa stöðugt, þar til hann hefði síast inn í alla króka og koma mannlegrar tilveru.

Samkvæmt núgildandi samningi umhverfisráðuneytisins og Sambands íslenskra sveitarfélaga um Staðardagskrárstarfið á landsvísu leggja samningsaðilar samtals um fimm milljónir króna til verkefnisins á ári. Þessu til viðbótar hafa umhverfisráðuneytið og iðnaðarráðuneytið í sameiningu lagt til sjö milljónir króna á ári samkvæmt samningi ráðuneytanna um sérstakt átak til að styðja við Staðardagskrárstarf í fámennustu sveitarfélögunum á landsbyggðinni.

Báðir ofangreindir samningar renna út í lok þessa árs og jafnframt rennur út samningur Sambands íslenskra sveitarfélaga við UMÍS ehf. Environice í Borgarnesi um rekstur Staðardagskrárskrifstofunnar. Umhverfisráðherra vakti athygli á því í ávarpi sínu að taka yrði afstöðu á þessu ári til áframhalds þessa starfs á landsvísu. Hún sagðist leggja áherslu á að starfinu yrði fram haldið, enda væri það brýnna nú en nokkru sinni.

Nú hafa 30 sveitarfélög samþykkt framkvæmdaáætlun til langs tíma í anda Staðardagskrár 21, og í tveimur til viðbótar er til samþykkt Staðardagskrár fyrir hluta sveitarfélagsins. Alls hafa 67 af 78 sveitarfélögum landsins komið að þessu verkefni með einhverjum hætti. Þá hafa 55 sveitarstjórnir samþykkt Ólafsvíkuryfirlýsinguna, þar sem sveitarstjórnir lýsa yfir vilja til að hafa sjálfbæra þróun að leiðarljósi í allri ákvarðanatöku.

Dagskrá landsráðstefnunnar.

Heimasíða Staðardagskrár 21.

Kolbrún Halldórsdóttir undirritar Ólafsvíkuryfirlýsinguna á landsþingi Staðardagskrár á Stykkishólmi í gær með Sif Karlsdóttur frá Tálknafjarðarhreppi og Aðalsteini Steinssyni frá Flóhreppi..
Birt:
March 21, 2009
Tilvitnun:
Umhverfisráðuneytið „Ellefta landsráðstefna Staðardagskrár 21 á Íslandi“, Náttúran.is: March 21, 2009 URL: http://nature.is/d/2009/03/21/ellefta-landsraostefna-staoardagskrar-21-islandi/ [Skoðað:May 20, 2019]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.

Messages: