Uppskrift af mjaðurtar-svaladrykk frá Önnu Karlsdóttur:

Tínið minnst 40-50 blómkólfa af mjaðurt í fullum blóma*, á stað fjarri byggð og þar sem gnægt er af henni.

  • Sjóðið 2 lítra af vatni með 1 kílói af sykri (gæti t.d verið helmingur hvítur og helmingur brúnn eða minna unninn sykur).
  • 3 -4 sítrónur (helst lífrænar, annars vel skrúbbaðar) í sneiðum.
  • Leggið blómin og sítrónur í skál eða pott í lög eins og lasagna - hellið síðan sykurvatninu yfir.
  • Látið kólna niður í stofuhita á meðan að hrært er varlega í mjöðnum.
  • Setjið skál á kaldan stað í fjóra sólarhringa og passið að hræra vel að minnsta kosti tvisvar sinnum á dag.
  • Síið vökvann í gegnum sigti og grisju og setjið á flöskur
  • Ef að þið notið glerflöskur þurfið þið að halda þeim í kælingu - annars plastflöskur.
  • Njótið - útþynnts drykkjarins með kolsýrðu vatni og klaka eða kranavatni.

*Mjaðurt, Filipendula ulmaria er mýkjandi og græðandi fyrir slímhúð magans, dregur úr sýrumyndun í maga, er bólgueyðandi, þvagdrífandi, barkandi og hitastillandi. Mjaðurtin hefur bæði verið kölluð vinur magans og magnýl grasalækna. Jurtin er einstaklega góð gegn sárum og bólgum í maga, einnig dregur hún úr miklum magasýrum. Vegna salisýlsykrunganna er mjaðurtin góð við alls kyn s gigt og bólgu í liðum, vöðvum og taugum. Mjaðurtin er afar mild jurt og hefur verið notuð handa börnum bæði til að slá á hita og eins við niðurgangi og bólgu í slímhíð meltingarfæra. Blóm og blöð mjaðurtar (mjaðjurtar) voru fyrrum notuð til að bragðbæta öl og vín og má rekja heiti hennar til þeirrar notkunar. (Heimild: Arnbjörg LInda Jóhannsdóttir í Íslenskum lækningajurtum).

Ljósmynd: Mjaðurt, Guðrún A. Tryggvadóttir.

Birt:
11. ágúst 2015
Höfundur:
Anna Karlsdóttir
Uppruni:
Náttúran.is
Tilvitnun:
Anna Karlsdóttir „Mjaðurtar-svaladrykkur - uppskrift“, Náttúran.is: 11. ágúst 2015 URL: http://nature.is/d/2011/07/31/mjadurtar-svaladrykkur-uppskrift/ [Skoðað:24. mars 2017]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.
skrifað: 31. júlí 2011
breytt: 11. ágúst 2015

Skilaboð: