Landvernd og Náttúruverndarsamtök Suðvesturlands standa að sýningu á nýrri fræðslu- og heimildamynd eftir Ellert Grétarsson, náttúruljósmyndara. Myndin ber heitið Krýsuvík - Náttúrufórnir í fólkvangi.

Í myndinni er fjallað um náttúru og sögu Krýsuvíkur og annarra svæða innan Reykjanesfólkvangs sem til stendur að taka undir virkjanir samkvæmt rammaáætlun. Sagt er frá merkilegri jarðfræði svæðisins og reynt að varpa ljósi á þau áhrif sem fyrirhugaðar virkjanaframkvæmdir munu hafa á verndargildi þess.

Myndin verður frumsýnd í Norræna húsinu á afmælisdegi Ellerts Grétarssonar, fimmtudaginn 10. janúar kl. 20.00. Allir velkomnir á meðan húsrúm leyfir. Sýningartími myndarinnar er 30 mínútur. Enginn aðgangseyrir.

Um höfundinn:
Ellert Grétarsson hefur getið sér gott orð sem náttúru- og landslagsljósmyndari og unnið til alþjóðlegra verðlauna á því sviði. Náttúruperlur Reykjanesskagans hafa átt hug og hjarta hans lengi og á undanförnum árum hefur hann ljósmyndað þær í ótal gönguferðum sínum um skagann. Myndirnar hafa birst víða og opnað augu fólks fyrir þeim verðmætum sem felast í ósnortinni náttúru. Ellert hefur unnið ötullega að náttúruverndarmálum á Reykjanesskaga og er einn af stofnendum Náttúruverndarsamtaka Suðvesturlands.

Birt:
10. janúar 2013
Tilvitnun:
Guðmundur Ingi Guðbrandsson „Krýsuvík - Náttúrufórnir í fólkvangi“, Náttúran.is: 10. janúar 2013 URL: http://nature.is/d/2013/01/08/krysuvik-natturufornir-i-folkvangi/ [Skoðað:28. mars 2024]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.
skrifað: 8. janúar 2013
breytt: 1. apríl 2013

Skilaboð: