Grasagarður Reykjavíkur varðveitir safn Rabarbara

Grasagarður Reykavíkur og Erfðanefnd landbúnaðarins hafa gert með sér samning um að Grasagarðurinn varðveiti safn rabarbaraklóna sem lengi hafa verið í ræktun á Íslandi. Með undirritun samningsins er plöntunum tryggður vaxtarstaður til framtíðar.  

Í stefnumörkun Erfðanefndar landbúnaðarins fyrir árin 2009-2013 er lögð áhersla á að leita eftir samstarfi við grasagarða og byggðasöfn til að varðveita gamlar íslenskar nytjaplöntur í klónasöfnum. Á þetta við um nytjaplöntur til manneldis, mat-, krydd eða lækningajurtir, auk plantna sem hafa menningar- og/eða sögulegt gildi.

Rabarbari hefur verið ræktaður hér á landi með farsælum hætti í að minnsta kosti 130 ár. Í Grasagarðinum eru varðveittir sextán klónar af rabarbara en þar af eru sjö íslenskir sem varðveislusamningurinn nær yfir.

Ljósmynd: Rabarbari, Guðrún A. Tryggvadóttir.