Umhverfisvottaðir Vestfirðir – Ráðstefna á Núpi 17. apríl

Ferðamálasamtök Vestfjarða standa fyrir metnaðarfullri ráðstefnu undir yfirskriftinni Umhverfisvottaðir Vestfirðir laugardaginn 17. apríl n.k. Ráðstefnan verður haldin í tengslum við aðalfund samtakanna á Hótel Núpi í Dýrafirði og hefst kl. 11:00. Ráðstefnan er öllum opin, en meðal framsögumanna verður Svandís Svavarsdóttir umhverfisráðherra.

Ferðamálasamtök Vestfjarða hafa unnið að stefnumótun vestfirskrar ferðaþjónustu undanfarna mánuði og haldið fundi um allan fjórðunginn. Mjög mikil þátttaka var á fundunum, en vel yfir 100 manns tóku þátt í umræðum um framtíð vestfirskrar ferðaþjónustu og þar með samfélagsins á Vestfjörðum. Á fundunum kom fram að umhverfismál brenna sérstaklega á Vestfirðingum og skýr krafa var uppi um að tekin yrði umræða um hvers kyns umhverfismál sem varða fjórðunginn.

Í beinu framhaldi af stefnumótunarfundunum ákvað stjórn Ferðamálasamtaka Vestfjarða að hefja strax undirbúning ráðstefnu um kosti þess að stefna að umhverfisvottun Vestfjarða. Tekið var upp samstarf við Náttúrustofu Vesturlands í Stykkishólmi við undirbúning ráðstefnunnar, en starfsmenn stofunnar hafa lagt fram tillögur um að Ísland verði fyrsta umhverfisvottaða landið í heiminum. Verkefnið er þegar komið vel af stað á Snæfellsnesi.

Á ráðstefnunni Umhverfisvottaðir Vestfirðir verða haldin fjölbreytt erindi. Rætt verður um stöðu umhverfismála á Íslandi og hvaða aðgerða sé hægt að grípa til, auk þess sem þessi mál verða sett í hnattrænt samhengi. Fjallað verður um almennt viðhorf til náttúrunnar og sagðar reynslusögur af vottun einstakra fyrirtækja, með áherslu á mikilvægi vottunar fyrir markaðsstarf og daglegan rekstur. Loks verður sagt frá sérstökum verkefnum, svo sem hugmyndum um rafbílavæðingu Íslands.

Á ráðstefnunni munu fulltrúar Náttúrustofu Vesturlands fjalla sérstaklega um hugmyndafræðina á bak við verkefnið Umhverfisvottað Ísland. Meðal fyrirlesara verður einnig Leo Christensen, atvinnumálafulltrúi Lolland kommune í Danmörku. Leo mun segja frá þeim aðgerðum sem stjórnvöld á Lálandi gripu til fyrir rúmum áratug þegar ástand í atvinnumálum þar var orðið nánast óbærilegt og þeim jákvæðu áhrifum sem þessi nýja stefna hefur haft fyrir íbúa og atvinnulíf eyjarinnar. Þá er ótalinn fjöldi annarra fræðimanna og sérfræðinga sem hafa látið umhverfismál til sín taka og munu miðla ráðstefnugestum af mikilli reynslu sinni á því sviði.

Ferðamálasamtök Vestfjarða stefna að því að fylgja ráðstefnunni eftir í samvinnu við Fjórðungssamband Vestfirðinga. Markmiðið er að umhverfisvottun Vestfjarða komist á dagskrá Fjórðungssambandsins og að vestfirsk sveitarfélög sameinist um að stefna að slíkri vottun.

Ráðstefnan á Núpi er öllum opin sem fyrr segir. Ekki verður rukkað þátttökugjald, en ráðstefnugestum er bent á að hafa samband við Hótel Núp til að panta sér mat og gistingu ef á þarf að halda.

Sjá grein um hvernig Ísland gæti orðið fyrsta umhverfisvottaða land í heimi.

Sjá dagskrá ráðstefnunnar hér að neðan:

11:00 Setning – Sigurður Atlason, Ferðamálasamtökum Vestfjarða

11:05 Ávarp umhverfisráðherra – Svandís Svavarsdóttir

11:15 Aðeins ein jörð: staða hnattrænna umhverfismála og mikilvægi aðgerða – Guðmundur Ingi Guðbrandsson, Umhverfis- og auðlindafræði og Stofnun Sæmundar fróða, Háskóla Íslands

11:45 Aðeins eitt Ísland: staða umhverfismála hér heima – Kristín Svavarsdóttir, Landgræðslu ríkisins

12:10 Umræður

12:20 Matarhlé

13:10 Endurreisn Lálands - Leo Christensen, atvinnumálafulltrúi Lolland kommune, Danmörku

13:40 Sjálfbært Snæfellsnes – Róbert A. Stefánsson, Framkvæmdaráði Snæfellsness

14:00 Umhverfisvottun Íslands – Menja von Schmalensee, Náttúrustofu Vesturlands

14:15 Reynsla umhverfisvottaðs sveitarfélags af leiðandi starfi í umhverfismálum – Erla Friðriksdóttir, bæjarstjóri Stykkishólmsbæjar

14:30 Umræður

14:40 Reynsla fyrirtækis af vottun – Rannveig Grétarsdóttir, Eldingu hvalaskoðun

14:50 Reynsla fyrirtækis af vottun – Aðalbjörg Þorsteinsdóttir, Villimey Tálknafirði

15:00 Umræður

15:10 Kaffihlé

15:30 Viðhorf ferðafólks til náttúru – Edward H. Huijbens, Rannsóknarmiðstöð ferðamála

15:50 Villt dýr að féþúfu – mikilvægi sjálfbærni – Ester R. Unnsteinsdóttir, Melrakkasetri

16:10 Rafbílavæðing Íslands – Sighvatur Lárusson, Northern Lights Energy

16:30 Hvernig birtist stefna vestfirskra sveitarfélaga í umhverfismálum? – Anna Guðrún Edvardsdóttir, formaður Fjórðungssambands Vestfjarða

16:40 Umræður

17:10 Ráðstefnuslit

17:30 Skoðunarferð með leiðsögn í garðinn Skrúð í Dýrafirði

20:00 Kvöldverður

Fundarstjóri: Stefán Gíslason, Environice

Sjá hér á Grænum síðum þá aðila á Íslandi sem hlotið hafa fullnaðarvottun Green Globe.