Nature.is

Eldsneyti úr sólarljósi og CO2

Miklar vonir eru bundnar við nýja tækni til að framleiða eldsneyti úr koltvísýringi með aðstoð sólarljóssins, en hópur vísindamanna undir stjórn Heriot-Watt háskólans í Edinborg vinnur að þessu. Hópurinn fékk nýlega styrk upp á 1,2 milljónir sterlingspunda (um 226 millj. ísl. kr.) til að auka skilvirkni í framleiðslunni og gera hana samkepnnishæfa á markaði. Afurðin úr ferlinu getur t.d. verið metan eða metanól, og ef vel gengur ætti þetta að geta minnkað kolefnislosun út í andrúmsloftið um 700 milljón tonn á ári, sem er meira en öll árleg losun Bretlands.
(Sjá frétt EDIE í gær).

Grafík: Heysátur og tilraunaglös, Guðrún A. Tryggvadóttir og Signý Kolbeinsdóttir.

Fyrirlestraröð Toppstöðvarinnar - Úrgangur og efniviður - vistvænar lausnir og endurvinnsla

Laugardaginn 2. febrúar frá kl. 11:00 til 13:00 verða þrír áhugaverðir fyrirlestrar fluttir hjá Toppstöðinni við Rafstöðvarveg.

Dagný Bjarnadóttir

Áhugi á vistvænum lausnum og endurvinnslu eykst með ári hverju. Sú staðreynd að úrgangur er vaxandi vandamál, ásamt því að hráefnisskortur er fyrirsjáanlegur í nánustu framtíð, leiðir hugann að því að nýta betur hráefni sem við köllum "úrgang“. Í fyrirlestri sínum mun Dagný Bjarnadóttir landslagsarkitekt kynna verkefni sem byggja á endurnýtingu hráefnis sem áður hefur verið sett til hliðar sem úrgangur. Fyrirlesturinn verður út frá myndefni af raunverulegum verkum og ferlinu sjálfu frá hugmyndafræði, hönnun og úrvinnslu.

Dagný Bjarnadóttir lauk námi sem landslagsarkitekt frá KVL (den Kongelige veterinær og Landbohøjskole) í Kaupmannahöfn 1992, verk hennar byggja á 20 ára starfsreynslu á fagsviði landslagsarkitekta. Dagný starfar undir nafninu DLD - Dagný Land Design sem stofnað var á vormánuðum árið 2011. Verkefni Dagnýjar eru fjölbreytt, þar á meðal eru innsetningar, vöruþróun og hönnun á nytjahlutum. Gróður -húsgögnin Furnibloom hafa vakið athygli víða um heim og urðu til þess að hún var valin til að hanna samnorræna landslagsarkitektúr sýningu, New nordic landscapes í tengslum við Expo í Shanghai 2010. Einnig var Dagný hluti af hönnunarteymi Flikk Flakk þáttanna sem sýndir voru í ríkissjónvarpinu síðastliðið sumar. Þættirnir eru raunveruleikaþættir, þar sem hugmyndafræðin byggir á þátttökuhönnun (participation design), þar sem í mjög hröðu og ódýru ferli er hægt að máta lausnir sem síðan má þróa og hanna nánar ef vel reynist. Í fyrilestrinum mun Dagný m.a sýna hvernig „úrgangur“ var nýttur í þessu verkefni.

Ásta Creative Clothes

Ásta Vilhelmína Guðmundsdóttir er fatahönnuður ásamt því að fást við ýmisskonar innsetningar á textilverkum og öðru. Að undanförnu hefur hún tekið þátt í vinnustofum, Symposium, hérlendis og erlendis. Ásta segir frá verkum sínum og því sem skiptir hana mestu máli í sköpun sinni.

Rafbílaþróun HÍ og LHÍ

Ragnheiður Björk Halldórsdóttir, Páll Gunnarsson og Einar Hreinsson, nemendur og leiðbeinandi í iðnaðarverkfræði við HÍ, munu flytja fyrirlesturinn um Formula Student. Verkefni sem þau hafa tekið þátt í frá síðasta hausti.

Um er að ræða hópverkefni sem unnið er fyrir Formula Student keppnina, sem haldin er ár hvert á Silverstone brautinni í Englandi. Í keppninni takast á lið frá hinum ýmsu heimshornum. Liðið, sem heldur utan um hönnun og smíði bílsins hérlendis kallar sig Team Spark. Þessi eins manns kappakstursbíll er bæði hannaður og smíðaður frá grunni af nemendum á verkfræði- og náttúruvísindasviði Háskóla Íslands ásamt nemendum í vöruhönnun Listaháskóla Íslands. Hópinn skipa aðallega verkfræðinemar sem allir hafa sameiginlegan metnað fyrir hönd verkefnisins sem slíks, ásamt því að öðlast við vinnu þess ómetanlega reynslu sem mun án efa nýtast þeim og samfélaginu til frambúðar. Mörgum þykir verk sem slíkt, að smíða kappakstursbíl, töluvert óraunhæft, en Team Spark nýtir reynslu sem hópurinn öðlast við þróun bílsins og trúir á árangur umhverfisvæns rafmagnskappakstursbíls.

Áform um vinnslu CO2 beint úr andrúmslofti

Kanadíska fyrirtækið Carbon Engineering hefur hafið tilraunir með vinnslu koltvísýrings beint úr andrúmsloftinu, og er stefnt að því að tilraunaverksmiðja til þessara nota verði tilbúin í Calgary fyrir árslok 2014. Enn ríkir mikil óvissa um kostnaðinn við vinnsluna, en talið er að hann verði á bilinu 20-2.000 dollarar á tonnið. Bent hefur verið á að þessi kostnaður gefi vísbendingu um sanngjarnt gjald fyrir að fá að sleppa koltvísýringi út í andrúmsloftið.
(Sjá frétt í New York Times 5. janúar).

Grafík: Skjáskot úr kynningarmyndbandi á carbonegineering.com.

Norræni byggingamarkaðurinn tekur höndum saman um sjálfbærni

Þann 13. september næstkomandi stendur Norræni nýsköpunarsjóðurinn fyrir opnum kynningarfundi þar sem fulltrúar Nordic Built kynna nýjan sjálfbærnisáttmála í mannvirkjagerð á Norðurlöndunum. Markmiðið er að virkja lykilaðila á íslenskum byggingarmarkaði til þess að taka höndum saman um að efla sjálfbæra þróun í mannvirkjagerð á Norðurlöndunum.

Fundurinn er haldinn er í stofu V101 í Háskólanum í Reykjavík frá kl. 15-17 og er öllum opinn.

Stjórnendur sveitarfélaga, stofnana og fyrirtækja á Íslandi og allir þeir sem koma að byggingu og rekstri mannvirkja og hafa áhuga á sjálfbærni og norrænni samvinnu eru hvattir til að mæta og kynna sér sáttmálann og tengd verkefni.

Hvað er Nordic Built'

Nordic Built er samvinnuverkefni sem hvetur til þróunar samkeppnishæfra lausna í vistvænni mannvirkjagerð. Verkefnið miðar að því að Norðurlöndin nái markmiðum sínum um að vera leiðandi í nýsköpun, grænum hagvexti og velferð.

Byggingamarkaðurinn á Norðurlöndum nýtir ekki til fulls þau miklu tækifæri sem felast í vistvænni mannvirkjagerð og  endurbótum á byggingum. Markmið Nordic Built verkefnisins er að byggingaiðnaðurinn sameinist um að nýta sérþekkingu sína til þess að mæta aukinni eftirspurn eftir vistvænni mannvirkjagerð í heiminum. Leiðandi fyrirtæki í greininni hafa nú þegar tekið fyrstu skrefin og hvetja aðra til þess að gera hið sama.

Þann 8. ágúst undirrituðu 20 stjórnendur úr norræna byggingaiðnaðinum Nordic Built sáttmálann í Kaupmannahöfn, og sýndu þar með vilja sinn til breytinga. Með undirskriftinni skuldbinda þeir sig til þess að fylgja tíu meginreglum í starfi sínu og fyrirtækja sinna, og gera nauðsynlegar ráðstafanir til þess að þróa samkeppnishæfar lausnir í sjálfbærri mannvirkjagerð.

Við hjá KAB lítum svo á að sjálfbær byggð sé eitt stærsta og mikilvægasta umhverfisverkefnið í heiminum í dag. Nordic Built gefur byggingaiðnaðinum á Norðurlöndum möguleika á því að taka forystu á þessu sviði segir Jesper Nygård frá KAB í Danmörku.

Verkefnisstjóri Nordic Built, Eili Vigestad Berge frá Nordic Innovation, er ánægð með viðtökurnar við verkefninu.

- Norræni byggingaiðnaðurinn hefur þróað fjölda íhluta fyrir orkuvænar byggingar og öll Norðurlöndin leggja ríka áherslu á umhverfismál. Þar að auki er löggjöfin ströng og endurspeglar metnað okkar um að byggja bestu mannvirki heims. Norðurlöndin hafa einstakar forsendur fyrir því að marka sér sérstöðu á heimsvísu í vistvænni mannvirkjagerð. Samvinna landanna á milli gerir okkur kleift að nýta tækifærin á þessum vaxandi markaði eins og best verður á kosið. Við hvetjum því iðnaðinn í heild til þess að undirrita Nordic Built sáttmálann og fylgja þeim reglum sem hann setur, segir Vigestad Berge.

Frumkvæði frá stjórnsýslunni

Nordic Built er eitt af sex svokölluðum kyndilverkefnum sem stofnað var til í tengslum við mótun nýrrar stefnu um samvinnu í iðnaðar- og nýsköpunarmálum, með áherslu á grænan vöxt, sem norrænu viðskipta- og iðnaðarráðherrarnir samþykktu í október 2011. Norræna ráðherraráðið fjármagnar verkefnið ásamt Nordic Innovation, sem einnig er í forsvari fyrir framkvæmd þess í samvinnu við Norðurlöndin.

Nordic Built fer fram í þremur tengdum áföngum á tímabilinu 2012-2014. Í fyrsta áfanga verkefnisins hefur áhersla verið lögð á að skilgreina þær sameiginlegu áskoranir og tækifæri sem norræni byggingaiðnaðurinn stendur frammi fyrir. Sú vinna leiddi til Nordic Built sáttmálans, Nordic Built Charter, sem er kjarni verkefnisins.

Samkeppni í sjálfbærni

Annar áfangi Nordic Built hefst síðar á þessu ári. Aðilum sem sinna nýsköpun í byggingaiðnaði og á öðrum sviðum býðst að taka þátt í viðamikilli samkeppni um  endurbætur í takt við sjálfbærnimarkið í einni byggingu í hverju Norðurlandanna. Markmiðið er að vekja athygli á Nordic Built sáttmálanum með hvetjandi verkefnum, rausnarlegum peningaverðlaunum og mikilli umfjöllun.

- Með því að hvetja til samvinnu á milli landa og atvinnugreina viljum við stofna til nýstárlegs samstarfs sem skilar nýsköpun í byggingaiðnaði. Við vonum að samkeppnisandinn í greininni stuðli að nýjum hugmyndum sem koma Norðurlöndunum í forystu hvað varðar vistvæna byggð. Það er kominn tími til þess að grípa þetta tækifæri, segir Eili Vigestad Berge.

Nánar um Nordic Built:

Endurvinnslukort Náttúrunnar fyrir snjallsíma og spjaldtölvur

Í dag, á Degi umhverfisins og 5 ára afmæli vefsins, kynntum við Endurvinnslukorts-app sem er fyrsta græna appið af þremur sem við áformum að klára nú í ár.

Svandís Svavarsdóttir umhverfisráðherra var fyrst til að prófa appið á hátíðarhöldum dagsins í Listasafni Sigurjóns Ólafssonar á Laugarnesi. Appið er til samtykktar hjá Apple fyrir iPhone og ætti að birtast á næstu dögum í AppStore. Android útgáfa er einnig væntanleg á Market innan skamms. Endurvinnslukortið er ókeypis.

Appið eða snjallsímaforritið er hannað til þess að hjálpa öllum að finna næstu móttökustöð, sjá hvort hún sé opin þegar við hyggjumst losa okkur við rusl og sýnir okkur leiðina á korti. Auk þess eru ítarlegar upplýsingar um 113 endurvinnsluflokka og annað fræðsluefni um endurvinnslu að finna á kortinu.

Endurvinnslukorts-appið verður einnig gefið út á ensku undir heitinu The Recycle Map og þjónar þannig einnig landsmönnum sem ekki tala fullkomna íslensku og erlendum ferðamönnum.

Tilgangur Endurvinnslukortsins er að gefa almenningi eins fullkomið yfirlit og mögulegt er yfir hvar á landinu sé tekið við hvaða flokkum til endurvinnslu. Endurvinnslukortið er eitt af fjölmörgum samfélagslegum verkefnum sem Náttúran.is hefur ráðist í að eigin frumkvæði en ekkert slíkt yfirlit var til, í aðgengilegu formi fyrir allan almenning, áður en ráðist var í gerð fyrsta Endurvinnslukortsins á vef Náttúrunnar haustið 2008. Vefkortið hefur einnig verið uppfært og þjónustuupplýsingar auknar. Endurvinnslukorts-appið hefur verið í þróun frá hausti 2011 og mun halda áfram að vera í stöðugri þróun enda eiga nú miklar breytingar sér stað á sviði endurvinnslumála á Íslandi.

Grafík: Hnappur Endurvinnslukortsins sem sýnir ruslatunnu með vængjum enda er undirtitill Endurvinnslukortsins „þar sem ruslið þitt fær annað líf“. Hönnun Guðrún A. Tryggvadóttir.