Nature.is

Málþing um ferðamennsku á háhitasvæðum

Landvernd efnir til tveggja málþinga um sjálfbæra ferðamennsku á háhitasvæðum, annarsvegar í Reykjavík og hinsvegar í Mývatnssveit (sjá hér að neðan). Háhitasvæði eru eitt helsta einkenni íslenskrar náttúru og eftirsóttir ferðamannastaðir. Mikilvægt er að tryggja vernd þessara einstöku auðlinda okkar þannig að núlifandi og komandi kynslóðir geti notið þeirra áfram.

Dagskráin er eftirfarandi:

13:00 Setning málþings - Sveinbjörn Björnsson, fyrrv. rektor Háskóla Íslands

13:05 Geothermal developments, tourism and the environment - Trevor Hunt, jarðeðlisfræðingur, Nýja Sjálandi

13:45 Tourism impact on nature conservation areas - management objectives - Ólafur A. Jónsson, sviðsstjóri, Umhverfisstofnun

14:05 Sustainable tourism development in vulnerable volcanic environments: Idealism or realism? - Rannveig Ólafsdóttir, dósent við Háskóla Íslands

14:25 KAFFI

14:45 Sharing Special Places - Ensuring we protect what we value - Laura Dawson, meðlimur í Forest and Bird, Nýja Sjálandi

15:25 Strategy building for Iceland's sensitive tourist attractions - Ólöf Ýrr Atladóttir, ferðamálastjóri, Ferðamálastofu

15:45 Nature conservation as the cornerstone of tourism - Guðmundur Ingi Guðbrandsson, framkvæmdastjóri Landverndar

16:05 Pallborðsumræður

17:00 Málþingi lýkur

Fundarstjóri: Anna G. Sverrisdóttir, stjórnarkona í Landvernd.

Fyrsta græna maí gangan

Græningjar úr öllum flokkum og stéttum þjóðfélagsins flykktust að Hlemmi uppúr hádegi í dag til að taka þátt í „grænu göngunni“ sem náttúruverndarsamtök landsins höfðu boðað til. Tilefnið var að hvetja nýkjörið Alþingi til góðra verka í umhverfismálum og til að minna á að þingið hefur ekki umboð til að framfylgja virkjanastefnu á kostnað náttúrunnar. Þúsund grænir fánar kláruðust fljótt í byrjun göngunnar enda göngumenn a.m.k. fimm sinnum fleiri en fánarnir. Gangan líðaðist friðsamlega í grænni litadýrð niður Laugaveginn og beygði að Austurvelli þegar rauða ganga ASÍ sem á undan gekk fór beinustu leið að Ingólfstorgi. 

Græna gangan var a.m.k. þrisvar sinnum stærri og það lá í loftinu að græni bylgjan hefur ekki enn náð eyrum verkalýðsforystunnar sem krefst stóriðjustefnu af öllum ríkisstjórnum, kosningar eftir kosningar. Þar af leiðandi hefur orðið ákveðinn trúnaðarbrestur milli verkalýðsforystunnar og náttúruverndarsinna, það verðum við að horfast í augu við. Krafan um ný störf er allt önnur en krafan um stóriðjustefnu og bólustörf við virkjanir og byggingar álvera enda er umhverfishreyfingin á þeirri línu að græn og skapandi störf séu framtíðin og þau einu sem eru í takt við sjálfbæra þróun. Ekki svo að skilja að grænu göngunni hafi verið stefnt gegn göngu verkalýðsins því svo var ekki, heldur varð að nota þennan dag, þennan frídag, milli kosninga og stjórnarmyndunar, til að minna á mikilvægi náttúruverndar á næstu árum. 

Græningjar úr öllum flokkum hafa aðeins eina sameiginlega kröfu og hún er að náttúran verði í fyrsta sæti við myndun nýrrar ríkisstjórnar og við stjórn landsins á kjörtímabilinu og minna á að ekkert verður gefið eftir í því efni, ekki millimeter, enda er náttúran forsenda lífsins á Jörðinni og lífsins í landinu.

Opið hús hjá Garðyrkjuskólanum Reykjum

Verið velkomin í Garðyrkjuskólann Reykjum í Ölfusi (við Hveragerði) á sumardaginn fyrsta þ. 25. apríl nk. frá kl. 10:00-18:00

Nú eru ríflega 50 nemendur við nám á garðyrkjubrautum LbhÍ að Reykjum, á fjórum brautum, blómaskreytingum, garð- og skógarplöntuframleiðslu, skrúðgarðyrkju og ylrækt. Hefð er fyrir því að bjóða vorið velkomið með hátíðardagskrá á sumardaginn fyrsta.

Á markaðstorgi verður til sölu grænmeti, blóm, grænmet s.s. brakandi ferskt hnúðkál, kryddjurtir o.fl. Kaffi og veitingar til sölu á kaffistofunni. Hægt að heimsækja hitabeltið í bananahúsinu og pottaplöntusafnið. Afhending Garðyrkjuverðlaunanna 2013 og andlitsmálning og leikir fyrir börnin.

Ljósmynd: Vorboðinn, Guðrún A. Tryggvadóttir.

Málstefna um Þingvelli: Blámi og tærleiki Þingvallavatns í hættu!

Munu komandi kynslóðir erfa gruggugt vatn með fátæklegra lífríki?

Náttúruverndarsamtök Suðvesturlands og Náttúruverndarsamtök Suðurlands standa sameiginlega fyrir málstofu um Þingvelli miðvikudaginn 3. apríl 2013. Málstofan verður í fundarsal Ferðafélags Íslands, Mörkinni 6 í Reykjavík, hefst kl. 14:00 og lýkur kl. 17:00. Aðgangur er ókeypis og öllum heimill.
Dagskrá málstofunnar verður þessi:

1. Fulltrúi þjóðgarðsins á Þingvöllum:  Inngangserindi
2. Guðrún Ásmundsdóttir leikkona: Heimsókn til Þingvalla. Stuttar frásagnir með óbó-millispili Eydísar Franzdóttur.
3. Hilmar J. Malmquist líffræðingur: Þingvallavatn. Einstakt vistkerfi undir álagi
4. Pétur M. Jónasson vatnalíffræðingur: Heiðrun hans og ávarp
   Stutt hlé.
5. Sigrún Helgadóttir líffræðingur: Þjóðgarðurinn Þingvellir,- fyrirlestur.
6. Margrét Sveinbjörnsdóttir menningarmiðlari: Af vatni og fólki – mannlíf við Þingvallavatn á 20. öld
7. Sigurður Steinþórsson jarðfræðingur: Jarðminjar – fyrirlestur

Um fyrirlesarana er þetta helst að segja:

Hilmar J. Malmquist líffræðingur á Náttúrufræðistofu Kópavogs hefur um árabil annast rannsóknir vatnssýna úr Þingvallavatni. Stutt samantekt hans á efni fyrirlestrarins er þessi:

Fjallað verður um sérstöðu Þingvallavatns og ástand vatnsins m.t.t. vatnsgæða og álagsþátta, einkum er varðar efnamengun og loftslagshlýnun. Byggt er að mestu á niðurstöðum í vöktunarverkefni sem Náttúrufræðistofa Kópavogs hefur tekið þátt í með árlegri sýnatöku síðan 2007, en einnig er stuðst við niðurstöður annarra rannsókna sem sumar hverjar ná allt aftur til 1907. Rannsóknaniðurstöður sýna að umtalsverðar breytingar hafa átt sér stað í efna- og eðlisþáttum og lífríki vatnsins á undanförnum áratugum. Þingvallavatn hefur hlýnað í kjölfar loftslagshlýnunar, styrkur næringarefna í írennsli vatnsins norður í þjóðgarðinum lítur út fyrir að hafa aukist og þörungamagn úti í vatnsbolnum hefur vaxið og rýni minnkað. Þá gætir staðbundinnar hitamengunar við sunnanverða strönd vatnsins af völdum Nesjavallavirkjunar. Þrátt fyrir framangreindar breytingar og áhrif af mannavöldum er ástand Þingvallavatns enn mjög gott samkvæmt viðmiðum fyrir umhverfisbreytur í reglugerð nr. 796/1999 um varnir gegn mengun vatns. Ef heldur fram sem horfir er hins vegar hætt við að margrómaður blámi og tærleiki Þingvallavatns muni rýrna með tilheyrandi skakkaföllum fyrir lífríkið.

Sigrún Helgadóttir, líffræðingur, er í fremstu röð fræðimanna um íslenska þjóðgarða og hefur unnið einarðlega að náttúruverndarmálum. Bók hennar Jökulsárgljúfur – Dettifoss kom út árið 2008 og hlaut fræðiritaverðlaun Hagþenkis árið eftir. Síðustu ár hefur hún unnið að rannsóknum á sögu og náttúrufari Þingvalla og árið 2011 kom út bók hennar Þingvellir – Þjóðgarður og heimsminjar. Það er fjölbreytt vandað fræðirit og hverjum þeim, sem njóta vill þeirrar náttúruperlu, mikill fengur.

Sigurður Steinþórsson, jarðfræðingur og prófessor emeritus við Háskóla Íslands, var í forustusveit þeirra ungu jarðfræðinga sem höfðu áttað sig á mikilvægi landrekskenningarinnar í jarðsögu Íslands á sjöunda áratug 20. aldar. Honum eru gliðnunarbelti Íslands svo sem um Þingvelli vel kunn og þekkir því jarðmyndanir og jarðsprungukefi þar og þá um leið vatnasvið Þingvallavatns. Þá hefur hann einnig góða þekkingu á sögu íslenskra jarðfræðirannsókna.

Ljósmynd: Þingvallavatn ©Árni Tryggvason.

Sólarkaffi

Í mörgum þröngum fjörðum og dölum landsins, einkum á Vestfjörðum og Austfjörðum, líða oft nokkrar vikur eða mánuðir svo í skammdeginu, að sólin sést ekki yfir fjallabrúnir. Þegar hún birtist aftur, var og er víða venja að fagna henni með dálitlu tilhaldi svo sem kaffi og pönnukökum. Tímasetningin var auðvitað mismunandi eftir legu einstakra bæja, svo að vart var um sameiginlega hátíð að ræða fyrir heilt byggðarlag. Í kauptúnum gat hinsvegar komið fyrir að fólk tæki sig saman. Á síðari áratugum hafa sum átthagafélög í stærri bæjum, einkum Reykjavík, tekið upp þann sið að hafa svokkallað sólarkaffi einhvern dag í nánd við endurkomu sólarinnar í þeirra heimasveit.

Ljósmynd: Pönnukökuveisla, Guðrún A. Tryggvadóttir.